بسم الله الرحمن الرحيم
وبعض اشياء .. بعض من الحياة ، بعض من الايام ..
مثل كل بداية موضوع في سلسلة بعض اشياء ابداها بوصف كمية الفقد للكتابة و اللي يكون بسبب ما ، انشغال ، عدم الهام تراكم اعمال ،، او ببساطة انتظر الموضوع يناديني ..
في هذا الشهر اغسطس ، كان فيه كثير حاجات ممكن اتكلم عنها ، احتاج سبب للكتابة ، ما اكتب فقط للتواجد ..
اعترف اني انسانة بسهولة اتشتت ، قررت هالفترة يكون تركيزي على المدونة ، مكاني الخاص اللي ابث فيه ايجابية احبها ، مو شرط تكون ايجابيتي من ادعاء الكمال ، ولكن عشان تكون سبب لاوقاتي السلبية ارجع و استلهم واعطي نفسي رفعه معنوية ..
* * *
وانتهت الاجازة ، لامهات المدارس ، وبيرجع وقت الروتين والنظام ، وبالاضافة لكذا بالنسبة لي ، وقت الربطة من جد لا روحة من هنا ولا هنا ،، كنت في السنوات اللي قبل ماتدخل تالا المدرسة الوقت ماله اي معنى كتاريخ ، لكن صار الحين كل شي محسوب باليوم ..
دان (بنتي الصغيرة) بتكمل الشهر الجاي ٥ سنوات يعني عالسنة الجاية بتدخل صف أول ، في حالتي ، احس اني ابي ادخلها تمهيدي ، ماحسيت بكذا مع تالا ، بس ابيها تطلع و تتعود ، هي حساسة شوي ، مو اكثر من الكبيره ههه بس ابيها تشوف العالم قبل ما تبدا انتظام ، ان شاء الله تتسهل و ادخلها هالسنة لو عالترم الثاني ..
الاسبوع اللي فات ، استوعبت ان المدرسة بعد اسبوع ، وانا بالعادة اتجهز قبلها بشهر مو اكثر عالاقل القا اشياء تخلص بسرعة مثل القمصان البيضاء ، وعالاكثر عشان اتفادى الزحمة الزحمة ..
في ويكند رحت لـ جدة و خلصت كل شي و دان كان لها نصيب ادخلها بالجو شوي :))
ومن الترتبيات للمدرسة فضيت دولاب صغيرون حق الاغراض ،، انا اشتري بس مرة وحده لطول السنة ،،
التجليدات المقصصة و جاهزة رحت ادورها في جرير دوارة هههههه ، العام كنت حديث البنات لما نزلت صورة التجليد مال اول هنا و هنا واني شوفوني منهمكة في العمل ،، وكل التعليقات انه ليه التعب فيه جاهز وانااا بالنسبة لي مدري عن ايش يتكلمون ،، حاجة جديد ، اول سنة ام مدرسة هههههه بس للحين مو مقتنعه يعني هالجاهز بس يريحنا من القص !! هو اسهل شي طيب :/ !!
المرايل الوردية شي يبهج و يفتح النفس بس مشكلته شي واحد!! ان كل يوم لازم غسيل ، فشريتلها 4 مرايل مرة وحده ،، ماشوف نفسي انشغل بمريولها نظيف او لا ، كنت اقول لتالا كل يوم انتبهي عالمريول لا يتوسخ ولا تركضين وبلاش لعب كثير ، فحسيت اني امنعها من انها تكون بنت طبيعيه (التحكم الكريه الي ابي اتخلص منه) ومن تجربتي لقيت محل حق المرايل اقمشته غسيل و لبس على قولتهم هههه هو مريول الحر ، اقمشتهم تهبل ، لاني شريت من المحلات اللي في السوق اثنين العام ومع الغسل يتنتش .. فخلاص ريحت راسي من اللف والدوران ..
من الاشياء اللي ابي اسويها كل سنة بإذن الله هو تصوير اول يوم دراسي ، سويتها العام و ان شاء الله هالسنة اسويها بس طبعاً لازم اقوم بدري ههه ، حلو الروتين في الذكريات ، الطقوس ، ترجعين بعد كم سنة تشوفين كيف كنا والحين كيف وكيف ..
هذي الصورة صورتها السنة اللي فاتت ..
* * *
نجي لي ،، من القرارات اللي اتخذتها هالشهر اني اتحرررك ، اكون صحية اكثر خاصة من جانب الحركة و الرياضة ، اعترف انا انسانة ماعندي لياقة ابداً ،، الوقت الوحيد اللي امشي فيه في السوق ،، ومايعتبر مشي لان كل شوي موقفة ، بس مثلاً مشي العمرة احس ايش ههههه يعني فوق الاحساس الحلو من القرب لربك ، احساس اني رئتيني تتنفس ..
خصصت لي وقت في اليوم امشي فيه عالتريد ميل ، نص ساعة في اليوم و بس ماحطيت لنفسي اصعب من كذا عشان ما تكاسل ،، وصارلي اسبوع عالروتين وعال العال الحمد لله ..
ومكتبي و زاويتي و مساحة كتابتي و تدويني و تصويري ،،
من نقلت المكتب ، كان يطل على شباك الصالة الكبير ، والحين خليته عالجنب ، تغيرت نفسيت من جد ما بالغ ، صرت ابي اكتب و فيني نشاط (السبب الاول لهالنشاط اتوقع اني غيرت الثيم للمدونة ههه) صرت اتحمس اكتب و مخليه تركيزي على المدونة بس ، لقيت ان الانستقرام والسناب يسرقون من الوقت ماتخيلت انه هالقد ...
من باب انيابي اركز لاني مثل ماقلت بسرررعه اتشتت ،، ان الانستقرام ماراح انزله فيه ريفيوهات كالعادة ، وبخليها فقط عالمدونة ،، بس بخلي الصور صباحات و مساءات وسوالف ،، الى ان يطري لي طاري جديد :))
وما اقولكم على السناب ،، صرت ما ادخله الا باليومين ولا افتح كل شي فيه ،، مو معقوله شقد يضيع الوقت ، يعني صرت افتحه وانا امشي بس وقت التمرين او لو دخلت اشوف اهلي وصديقاتي اخبارهم و بس ، مو متخيله انه كان يسرق وقتي مع بناتي ،، يعني كنت اتفرج اختم كل السنابات وبعدها انتبه انهم تعشوا و راحوا ينامون ، كنت معهم جسم بس ،، وارد عليهم همهمه وغير كذا كان نومي فيه قلق واقوم مو مرتاحة ماشبعت واعصابي فالته لاني كنت انام واتفرج عالسنابات، وانام والمخ شغال مو مرتاح مشغول بسالفة هذي و طريقة هذا ،، صرت قبل النوم بساعة عالاقل مافتح شي ، بس بنترست يمكن ههههه والله فيه طاقة ايجابيه و دايم يقولون اللي تفكر فيه قبل النوم بـ ٢٠ دقيقة راح تقوم ثاني يوم على نفس الاحساس ،، انا اللي كنت الخسرانة في الاخير وبعدها خلاص انتهى الحين وقت الراحة ..
قبل يومين ، حدثت نظام الماك من مافريكس Mavericks لـ يوسميتي Yosemite ، كنت قبلها متخوفة مرة و موحابته ، شفته عن الهزبند وماحبيته من اول نظرة و غير كذا بحثت الريڤيوهات عنه وكانت مرة غير مشجعة ،، بس من صرت احمل برامج الكل يطلب ان النظام يكون اعلى من الموجود عندي حالياً ،، قلت خلاص ماراح اعيش لحالي ولازم اسهل الامور اكثر وحملته وبصراحة حلو للان ما شفت منه اي شي مو حلو .. حبيته ..
لو بتكلم عن نقطة يسألوني عنها كثير ، جهازي هو ماك بوك برو ، اخترته لسبب اني اشتغل على برامج تصاميم مثل الفوتوشوب و الاليستريتر وفيديو وكذا ، وهالبرامج تحتاج ذاكرة كبيرة و سرعة عالية، الاير مايُنصح فيه لهالاستخدامات ، فقط للتصفح و البرامج العادية ممكن ..
* * *
ارجع للمكتب السعيد ،، هذي الزاوية فيها اشياء كثير حاطة في بالي اني اسويها ، ومنها اني اسوي مثل القاليري وول ، يعني نفس الجدار اللي عليه المكتب اخليه مثل معرض إلهام فيه اختصارات لعبارات احبها و تحفزني انا ، او عبارات لها معنى لحياتي وتعنيلي ..ناوية ان شاء الله اكتب موضوع كامل عنها بس انتهي..
اللوحة هذي هي اللوحة العادي اللي لونها بني و تتعلق فيها اوراق بدبابيس ، كان مو عاجبني لونها وقلت يمكن اغطيها بورق ملون ، بس تذكرت اوراق التغليف حق ديزني والفيتها فيه ومشا الحال :))
* * *
من ضيوف البيت الجدد ، هالنبتات الجميلة ،، امس رحت لمشتل ،، والعامل فيه قهرني ،، ما ياخذ ويعطي و انا وحدة ماعرف اخذ واعطي يعني كلمة ورد غطاها .. فاخذت اقل من اللي كنت ابي بس برضو حلو ،، يعطي جو خاصة بعد مانقلت المكتب صارت المنطقة هذي تبين ،، واخذت للبنات كل وحدة نبتة فيها ورد من باب انهم يهتمون بشي ويرعونه ،، ذبحوني كل وحدة تبي سمكة و الثانية تبي كناري ووحدة قالت ابي بسة انا هناااا لاالاالاا احب البسس (القطط) بس عند الناس ما اقرب منها نفسي احبها بس ماش ،، صعب بهالعمر يتعود الواحد على شي جديد خاصة اني ما اتقبل فكرة شي مو انسان يمشي و يتحرك ،، اخاف ،، ههههههه ...
يعني وكذا خلصت السوالف ، اتمنى اني القى شي اسولف فيه اسبوعياً وتصير بعض اشياء لها وقت محدد ،، بس مابي اكتب لمجرد الكتابة ، ادور على فكرة مضبوطة وان شاء الله القاها ...
Subscribe to our mailing list
