بعض أشياء سعيدة في ٢٠١٥ Happy Few Things in 2015

بسم الله الرحمن الرحيم

وخلصت هالسنة وكلها ساعات وأول يوم بالسنة الجديدة تبدأ لبقية رحلتنا في الحياة ..



كانت سنة ٢٠١٥ سنة فيها تقلبات من كل نوع ،، لما فكرت ايش ممكن يكون موضوع اللي ممكن يختصر هالسنة ،، اول شي جا ببالي أشياء صارت لي ، مريت فيها وعشتها ،، أشياء سعيدة أشارككم فيها :)

على الصعيد العائلي ، كانت أجمل مناسبة هي زواج أخوي .. هو أول شي جا ببالي .. كانت فرحة من القلب الحمدلله يارب ، في حفل الزواج كنت اطالع أمي طول الوقت واتابعها عشان انتبه لو تأثرت او دمعت عشان اكون معها بس لقيت نفسي انا اللي دموووع مع اني ماكنت متوقعه هالشي ابد ، يعني مفكرة نفسي أجبر من كذا بس ماقدرت ههههه .. اخوي اقرب الناس لي مع اني اانا الكبيرة بس هو مثل الصديق بالنسبة لي ،، وكلنا كنا ننتظر هاليوم لانه اول زواج للشباب في العيلة و عقبال الباقي يارب ..

بالنسبة للتحضيرات و لاني بعيدة عنهم ،، هم في الشرقية وانا في الطايف ،، فماكنت داخله معهم في التوتر والجو بس ماقصرت امي كل يوم كانت تكلمني تقولي شصار،، حرصها أثر فيني وقولها لي انتي راس المال ،، قلبي انقبض بمجرد كتبت ،، الله يخليلي امي وعائلتي يارب ويحفظ أحبابكم ..

من مميزات هالسنة ،، اني صرت اشرب قهوة من غير حليب ،، والله انجاز ،،

بعد سنين من هالعادة ، ماكنت اتخيل ممكن اشربها كذا لحالها ..

ومنها صار عندي اهتمام اكثر بأدوات القهوة و تحضيرها و انواعها بعد اللي يناسب طعمها ذوقي وكيف اعرف اانا وش احب واعرف اميز بعدين بين المذاقات ..

بالرغم من هالحب لكن في يومي كوب قهوة واحد يكفيني .. هو الكوب اللي أبدأ فيه صباحي كل يوم ..

ومن هالكوب تبتدي الافكار وو الاحداث ، وقت الصباح والنهار ..

ومخليته سبب كافي اني اتواجد في العالم الافتراضي بكلمة او صورة عن هالقهوة ..

كلنا نحتاج اسباب :)



***



من مشتريات هالسنة ، لقيت انه مو مثل السنة اللي راحت اللي كانت مشترياتي فيها مكياج وتجميل و عناية، لا ،، كل مشترياتي كانت اغراض للبيت ،، اكواب ، تحف ، اشياء ازين فيها مكتبي ، غرفتي ، زاويتي ..

لقيت نفسي كل ماراحت مكان غريب ، اشتري منه قطعة ، احب اكوِّن قصص مع أشيائي ، اتعلق فيهم مرة هههه ..

ومن هالمشتريات ،، واللي كان لها اثر كبير في صحتي بصراحة هالصوفا او الكنبة او اللي ودكم تسمونه ..

هي اسمها Movie Chair ,, او كرسي الافلام وحق السينما المُصغرة في البيت لو قلنا يعني ..

السبب لشرائي لها اني في صالتي الكنب وتوزيعه ، جلستي تكون بشكل مايل ، يعني التلفزيون يكون في الوسط و الكنب عالجنب فأضطر اني اميل ظهري واجلس غلط لساعات من غير ما أحس ،، ومنها تجيني آلام ظهر كانت ماتخليني انام و تتعبني جد ..

فـ جا يوم وقررنا نشتري هالكنبتين (من بوتري بارن) ومنها خليت مكانها مقابل التلفزيون على طول ،، ومن حسن حظي ان الصالة مو صغيرة ولا كبيرة على قدنا بس حجم الكنب الكبير كان مناسب جداً ..

كنبة الاسترخاءه هذي فيها كهرب تشبكينه وامكانية انك تمدينها من تحت وتمدين رجولك عليها ، من غير مبالغة من اول اسبوعين لاحظت الفرق واثره على ظهري ،، شريت راحتي :)



***



من القرارات الصحية بعد اللي كان لها اثر كبير في حياتي ، اني قطعت الاجبان!!

في قصتي ، كان القوقلون بالنسبة لي شي ما اعرفه ، لكن مع الحياة لاحظت اني اعاني منه مو بشكل كبير عادي مرة ، واغلبه لو عصبت او شي ،، او لو اكلت شي معين ..

المهم كانت زيارات هالقولون موسمية . كل ٤ الى ٥ شهور ، وبعد رمضان لاحظت انه صار يجيني الامه في الشهر مرتين!!

مو طبيعي ، اول مرة اعرفه كذا ! يعني فكرت انه فيني شي كبير وبدت الوسوسة بس بيني وبين نفسي مع انمي عارفة انه قولون بس مستغربة ليش هالكثر جاي ومأثر على حياتي ما يخليني اعيش يومي بشكل طبيعي ..

قعدت ابحث واقرا ،، وقريت كثير في المنتديات و التجارب ،، ومنها قريت وحده كتبت عن الاجبان و أثرها ،، فقررت اني اقطع كل شي فيه جبن ،، ترا هالقرار مو بهالسهولة بالنسبة لي ، انا وحده عايشة على الجبن ، كل يوم فطوري توست وجبن ولو بغير توست وجبن و شي معه اهم شي جبن ،، غير باقي اليوم اللي الغدا والعشا فيه لايخلو من الاجبان ..

من اول اسبوعين من هالحمية لاحظت الفرق ،، كنت انتظر بيرجع لي القولون كل اسبوعين مثل اخر ٤ شهور ولا لا ، بس الحمدلله كل شي كان هادي ومريح وارتحت ارتحت ..

هذا كان احسن شي سويته واحاول اني بعد اقلل استهلاك الجبن حتى لبناتي ..

مايمنع اني مرة اكلت جبن في مطعم كنت انتظر أجربه بس الحمدلله عدت على خير لاني حسيت بتأنيب ضمير فضيع بعدها هههههه ..



***



من الناحية الجمالية بالنسبة لي ،، سنة ٢٠١٥ كانت سنة الشعرات الشقر هههه

مليت من شعري ،، هو بطبيعته خفيف و يتساقط وداريته داريته بس طبيعته يتساقط فقلت على ايش دامه كذا خليني العب فيه شوي و منها اغير وتتغير النفسية معها و بديت مشوار الصبغات اللي كنت منقطعه عنه كم سنة ، مع اني متعودة عالتصبغ و اللعب بنفسي من كنت صغيرة فعارفة شسوي والله يخلي اليويتبو ، بالرغم من بعض التجارب الفاشلة بس في النهاية لقيت اللون اللي كنت ابغاه ..



العناية بالشعر الاشقر الرمادي (البلاتيني) من اصعب المُهمات ،، يحتاج ترطيب مستمر و دراية باللون عشان مايقلب للون الرعب اللي هو البرتقالي والنحاسي ،، بس النتيجة تمام التمام ..



من الاشياء اللي جربتها لاول مرة هو ابرة البوتوكس !!

جتني فترة كنت ابي انفخ شفايفي (فيلر) ،، المهم ابي اسوي شي ..

رحت للدكتور وعرضت عليه حالتي و مارضي يسويلي شي ..

لاني مركبة التقويم فأي نفخ للشفايف مايصلح ،، وقالي لازم انتظر لبعد ما اشيل البريسز ويصير خير ،،

اقتنعت بوجهة نظرة و رضيت ،، مع اني كنت اتحرقص ابي اسوي شي بس ماش ..

عاد الدكتور شاف اني ابي اسوي شي و مع الفحص والمعاينه اقترح على اني اعبي بوتوكس في منطقة الذقن ..

مو لغرض النفخ او شي لان البوتوكس شغلته يِشل حركة العضلات في المنطقة اللي بينحط فيها

من ملاحظته اللي خلتني اسويها ، انه قالي مع التعابير تطلع مثل النقط او الحفر (العرفطة) على الجلد في الذقن

يعني لما اسوي حركة البطة في شفايفي تبان .. وتوكلت على الله وسويتها ..

قبلها بيوم كان عندي موعد شَد في عيادة الاسنان و كان من ضمنها تركيب مغاطات في التقويم

المغاطات كانت بشكل يسكر الفك بحيث لازم اتحكم وابذل مجهود عشان ما ينعوج فكي ..

المهم بعدها بيومين من البوتوكس واللي قالي لا تبذلين مجهود في هالمنطقة لاحظت ان البوتوكس تجمع في الجهة اليمين ،، يعني لما امتعض الاقي النتيجة الزينة للبوتوكس في اليمين غير عن اليسار كنه رايح هناك و تذكرت انه بسبب اني كنت مركبه المغاطات واثرت اكيد في مكان البوتوكس هههههههههه

التجربة حلوة والنتيجة ما أثرت بشكل سلبي على وممكن اكررها بس مو الحين هههه ..

على صعيد التدوين و الحاجات الجميلة

في هالسنة غيرت قالب مدونتي ،، كان له تأثير كبير جداً جداً على من ناحية الحماس و النشاط

اعترف اني في الفترة اللي قبلها كان فيني قل حماس و تكاسل للكتابة ،، بس التغيير والشكل الجديد كان له دور ايجابي في زيادة الافكار :)

التغيير بالنسبة لي مستمر ،، يعني كل مادخلت المدونة غيرت شي بحيث ما يأثر على الشكل العام بس تفاصيل زيادة .. احب هالجو وادخل قصص :)))

وللسنة الجديدة ،، أحلام و قرارات و اهداف ..

ماكنت احرص كثير عليها اني احطها ببالي بس قلت ليش لأ ،،

خليني اجرب هالمرة و اكون واعية لحالي و نفسي ،، مريت بفترات صعبة شوي فاحتاج اني اتعلم منها و عليها اكوّن قرارت برؤية من تجربة راح تساعدني وتختصر علي وقت في اني ما امر في هذيك الاوقات بصعوبتها مرة ثانية ..



الاحلام راح تبقى احلام لو ما تَبعها خطة نمشي عليها لتحقيقها ..

خطوات ممكن تكون سهلة بس الاستمرارية والمواصلة كفيله بتحقيقها ،، اذا وقفت ماراح يتحقق لك شي بأي حجة كانت من كسل و تعب ولا قِل إلهام .. هذي كلها اسباب ومثل ما قلت نحتاج الى اسباب نعطيها لنفسنا عشان نبرر ،، فليش ماتكون افعالنا إيجابية! حتى في الاوقات المُنهكة نطلع بشغلة حلوة .. ممكن يوكن صعب علينا في البداية ننظر للأمور كذا بس كل شي بالدنيا يحتاج ممارسة ،، ويجي و يتحقق ..

احاول اكون اكثر هدوء

اتحكم بمشاعري اكثر

افهم نفسي واقرب لحالي اكثر

اكون واعية لحالي ولتقلباتي

الافكار السلبية راح اضحك عليها

افعالي ماراح تكون مجرد ردات فعل لما حولي من اسفززات

اصدق قلبي لما يكلمني

اعتز بنفسي واحترم انجازها وما احطها بمقارنات

انظم وقتي اكثر

اتأمل

اقرأ كتاب في الشهر

نفسي أولاً و عائلتي

اقدّر اكثر الوقت مع اللي احبهم واعيشه بكل حواسي

اتعلم شي جديد

اطور مهاراتي اكثر في التصوير واكافأ نفسي بكاميرا جديدة

اكون رئيسة نفسي

اكوّن لي شغلي الخاص

انجح اكثر

اواظب على عمل شي احبه من قلب

ارتب غرفتي اسبوعياً

ما اقوم من مكتبي الا وهو مرتب ونظيف

ما اشتري شي جديد الا له مكان

اكون مرتبة ومُنظمة زيادة حتى في افكاري

اوصل لوزن ٥٠ كيلو

اعتمد في اكلي على المنتجات الصحية

استمر في المشي اسبوعياً ٣ مرات

ازيد من مهارتي في الكتابة

افهم طبيعة من يقرأ لي

اركز على المدونة

اكتب موضوع بشكل اسبوعي

ما اسمح للمزاجية تتحكم في افعالي

ما احط لنفسي قيود تحصرني في جانب واحد

امارس عفويتي واسمحلها تكون بطبيعتها

اغمض عيوني عن السلبي

احتفل بالناس الايجابية في حياتي واقدرها اكثر

امدح و امدح و امدح من حولي واتفاعل معهم

انشر كلام جميل

ما اتذمر

اركز على اللي اقدر اغيره

احتفل بتحقيق اصغر الانجازات

احب نفسي

و احبها اكثر 

***

شاركوني اهدافكم و احلامكم 

الله يجعلها سنة خير ونجاح كلها توافيق يارب

ليصلكِ الجديد ؛ اشتركِ معنـا
Subscribe to our mailing list

تنسيق بسيط كلاسيكي Classic OOTD

بسم الله الرحمن الرحيم

اليوم موضوع مختلف :)

عن تنسيق لـ لبسي في جمعة عائلية ، بصراحة هالجَمعة كانت في العيد :))

بس مناسب لأي مناسبة حابتها ..



ستايلي عادة كلاسيكي .. احب الابيض والاسود ،، واوقات اتعمد التباين الحاد ..

في الموضة مزاجي غير متطرف ابداً ، اعتمد على تجديد اللوك بقطعة عالموضة تبرزه ..



 التفاصيل  



البلوزة | من محل في وافي مول | دبي

التنورة | محل عادي تلقينها انواع في السوق :)

الشنطة | شانيل

الفلات | شانيل

العقد والحلق | شانيل

التنورة هذي من اول ماشفتها حبيتها ، لونها على حليبي بيج فاااتح  وقَصَّتها دائرية ومن فوق مزمومة بشكل بتلات ، والقماش السبب الرئيسي لحبي لها وهوالكريب الصوف ، مو متأكدة اذا كاذ المسمى لطبيعة القماش بس لأن كل أحد يقوله بإسم ، واعتمدت تسميته عالغالبية :)

شريته من محل ملابس عادي ، في مجمع في الطائف ، هالمحل يفصل هالقطع وبألوان ثانية وفيه موديل من نفس القماش يجي قصير من الجنب والباقي طويل ،، حبيت هذي اكثر ، طولها لمنتصف الساق (تحت الركبة) ..

اول ما طرالي اركب عليها بلوزة على الجسم ماتكون فضفاضة لان قماش التنورة واقف فيعطي حجم للجسم من الخصر وتحت ، لكن  لان مقاسها واسع شوي علي (هذا اللي لقيته ههه) فغيرت الفكرة .. حلو لو تنسقين عليها توب ماسك ومزموم من الخصر وتطلع كذا منفوشة من تحت ، تعطي امتلاء خاصة لو منطقة الاجناب عندك صغيرة ، والتفاصيل للبلوزة جاية ..

البلوزة سادة ، حبيت كلاسيكيتها ،، وقَصَّتها من فوق واسعه من لكن ماتكشف من عند منطقة الصدر ، عرضها مابين عظام الترقوة (اعلى الكتف) قماشها كرريب خشن شوي وخفيف وطايح ، بس من عند الاكمام (٣ارباع) قماش ستان ،، ومن نهاية الكم و نهاية البلوزة من الاسفل مزمومة كنها مغاط بس فضفاض شوي مو ماسك ..



الاكسسوار ..

احب اللولو ،، يعطي اناقة وبساطة ..

من التنسيقات للبس العقد ، ويناسب فتحة التوب اللي عندك ، يكون العقد طويل ، يتناسب مع عرض فتحة البلوزة من فوق ..

وطوله يوصل منتصف الصدر ، شكله حلوو ..

وهذا كل شي لتنسيق اليوم .. ان شاء الله عجبكم الموضوع ..



وألقاكم في مواضيع وتنسيقات جاية :)

مع السلامة :*

اشترك معنــا ليصلك كل جديد
Subscribe to our mailing list

مراجعة : غسول من كلارينس ببذور القطن

بسم الله الرحمن الرحيم

مرحبا جميلاتي

موضوع اليوم ريڤيو عن منتج صار لي استخدمه فترة وحبيت اعرّفكم اكثر بمعلومات عنه :)



Clarins Gentle Foaming Cleanser

with Cottonseed



غسول من كلارينس ، رغوي ، ببذور القطن للبشرات العادية و المختلطة ، وفيه نوع اخر من نفس الخط للبشرات الجافة بالشيا.

سبب شرائي للغسول اني احب اغير المنتجات لبشرتي في روتين العناية ، لان بشرتي من النوع اللي يتعود على منتج و يبطل يعطي نتايج حلوة ، وهذا الغسول اخترته بالذات عشان استخدمه مع الكلاريسونيك في تنظيف الوجه.

موضوع سابق عن الكلاريسونيك ميا تو

الغسول نفسه حليبي بدون حبيبات ، ورائحته نظافة ، مو قوية ابداً ..

بشرتي ، مختلطة ، التي زون (الجبهة و الأنف و الذقن) دهني ، الحبوب غالباً تجي على فترات متباعدة من هرمونات او لو اهملت تنظيف بشرتي بشكل جيد ..

الغسول يجي في علبة بكمية ١٢٥ مل ، تحتاجين كمية صغيرة على فرشة الكلاريسونيك لوجهك كامل ونفس الشي لو تستخدمينه من غيرها ، يعطي رغوة جيدة جداً ، واحساس نظافة  من غير مايشد مررة البشرة.

في روتين عنايتي، استخدم الغسول هذا و الكلاريسونيك قبل النوم ، لو حاطة مكياج ، اشيل المكياج اول بالمزيل المناسب وبعدها اغسله بالغسول ..

بعد الغسول اكمل في روتيني قبل النوم ، من سيروم و كريمات ،، يعني في الايام اللي تكون فيها بشرتي مايلة للجفاف في الجو البارد ، الترطيب يكفي ..



غسول كلارنيس هذا من افضل الغسولات اللي جربتها في الفترة الاخيرة ، معتدل ، مايسبب جفاف او حبوب لبشرتي 

وناعم عالبشرة بحيث لو بغيت اغسل وجهي اكثر من مرة في اليوم اروح اغسلها من غير ما اخاف انه يجففها ..

المنتج صارلي ٤ شهور استخدمه ولسا ماخلص .. 

اتوقع قريب يخلص بس عشان العلبة بيضاء فمايبين لازم اقص طرفه هههه ..

سعره ١٣٠ ريال في ستاندات كلارينس ..

من الغسولات اللي انصح انك تجربينها لو حبيتي شي مناسب لبشرتك المختلطة او العادية.



 المنتج في سطور  :

• حجمه ١٢٥ مل


• رائحته لطيفة ومنعشة


• مناسب للبشرات المختلطة والعادية و حتى الدهنية


• ما استخدمه في ازالة المكياج


• كمية بسيطة تكفيك


• ناعم على البشرة ولا يسبب جفافها


• لا يسبب تهييج للبشرة او تكون حبوب


• سعره مناسب للكمية ولفترة استخدامك للمنتج


• عيبه مثل اي غسول ، علبته اللي مايبين فيها المتبقي من المنتج بس على اي حال مايأثر في اني راح اشتريه مرة ثانية ..

جربتي هذا الغسول ؟ وايش النوع المُفضل عندك هالفترة ؟ شاركوني :)





ألقاكم في مواضيع قادمة ..

مع السلامة :*

اشترك معنــا ليصلك كل جديد
Subscribe to our mailing list

تطبيق Pacca Alpaca

بسم الله الرحمن الرحيم

اليوم الموضوع عن تطبيق احبه عشان بناتي يحبونه و استفادوا منه مرة ..



لما كنا في اسبانيا ، نتمشى في سوق الاحد في مدريد ، وهوعبارة عن سوق شعبي ، البائعين فيه ماكانوا يعرفون غير لغتهم

حتى انجليزي مافيه ، وفي مرة من محاولاتنا لفهم سعر الغرض ، واللي كانت اعلى من اصابع اليد لان كل التعامل بالإشارة ، فالبائع يقول السعر بس مافهمته ، وماشوف الابنتي الصغيرة تقولي كم !! انا هنا بقيت اعيد عليها تقولي الرقم عشان احفظه ويالله تعلمت انطقه ههههه ودفعت له المبلغ وانا مو مصدقة ، ومشيت وقلت يمكن صدفة ، بس صرت اجربها في الاسعار والارقام باللغه الاسبانية ، وكانت تصيب في كل مرة .. فرحت فرحت هههههه ..

اقولكم عن السر!

كنت محملة للبنات تطبيق  باكا ألباكا Pacca Alpaca لتعليم اللغات بطريقة مُحببة للاطفال

وكانت من نتايج لعبهم انهم تعلموا الارقام، بالإضافة للعربية والانجليزية ، باللغة الاسبانية و الحين الفرنسية!

شي جميل و تطوير يُفرح كل أم و أب :)

سويت عنه فيديو صغير في انستقرامي من قبل هنـــا



فكرتي عن التطبيقات التعليمية ، هي وسيلة جداً ممتازة ، وبديل أفضل لي من شراء بعض الكتب التعليمية  المطبوعة؛ لأن فيها تفاعل مع الطفل في نفس اللحظة وتجذبهم وتحاكيهم في مجال يحبونه لان أغلب الاطفال الآن يجذبهم الألعاب على الأجهزة ، ففرصة يلعبون و بنفس الوقت يتعلمون شي مفيد .. فالقيمة جداً مناسبة والفائدة جيدة و مستمرة ..

التطبيق لليوم من باكا ألباكا Pacca Alpaca هو الجزء الثاني من سلسة تعليمية تربوية مُخصصة للأطفال

تتمَحور حول تعليم الأساسيات للغات مُتعددة للطفل بأسلوب بسيط و سهل وعن طريق اللعب ..

وفي هذا الجزء Travel Playtime، راح يتعرف الطفل على دول حول العالم ومعالمها المُميزة ..  

باكا ألباكا Pacca Alpaca فكرة أم سعودية وهي الدكتورة ساره فيصل آل سعود، بدأت لما كانت كأم تبحث عن تطبيق ممتع و امن لأطفالها ويدعم التعليم بلغتها الام وهي العربية ..

 واليوم فريق آنامل تِك | Anamil Tech هي شركة نامية متخصصين في تطوير تطبيقات خاصة للأطفال (وفازوا بجائزة الاعلام الرقمي بعد) وشغفهم هو التعليم واللغات ..

سلسلة باكا ألباكا Pacca Alpaca موجهه للأطفال  من عمر سنتين الى ٦ سنوات ، الرسومات فيها بألوانها و تفاصيلها جذابة جداً بِشكل احترافي مُحبب ..



يسافر باكا من دولة لأخرى ، وفي كل مكان راح يعرّف الطفل على ما يُميز هذه الدولة سواء من معالم فريدة أو أماكن ، عن طريق عدة انواع من الألعاب ، راح اوضحها بالصور التالية :)

كل نوع من الالعاب له نسخ مُتعددة لكل دولة ، تناسب اللي يميزها واهم شي مُنوعه بحيث ما يحس الطفل بالتكرار ، لأن هذا الكائن الصغير سريع الملل :)

للمزيد عن تطبيقات باكا ألباكا هنا



في بداية التطبيق راح يرحب بكم باكا ،، 

وبعد الترحيب ، حتلقون مثل اللعبة الدوارة حقت الملاهي ماعرف شسمها هههه ومعلَق فيها اكثر من نوع من الألعاب وكل نوع فيه مجموعات يعني حول ٥٠ نشاط ولعبة

انواع اللعبات والنشاطات مابين توصيل مابين النقاط ، و تركيب مجموعة من الصور لتكوين صوره متكاملة ، تلوين في لوحة ، استيكرات وتكملة الناقص من الصور ، ايجاد الفروقات بين صور مُتعددة ، وإيجاد الشيء المفقود بين مجموعة وهكذا ..



كل لعبة تبدا وبعد حلها تتضح الصور و يظهر العَلم للدولة :)



مثل الصور التاليه لعبة توصيل النقاط لتكوين مكان مميز في الدولة 

والألعاب الثانية مثل الفروقات بين الصور ولاحظت ان الالعاب تختلف في مستوى الصعوبة والسهولة بالتدريج

البحث عن الباندا في الصورة (أنا أرى)

لعبة التركيبه Puzzle

وبعد هناك العاب ثانية لدول متنوعة اتركها لكم تكتشفونها ..



القائمين على تطبيق باكا ألباكا قدموا وعود لكل من الطفل و أولياء الامور عن الفوائد اللي راح يحصلون عليها من خلال استمتاعهم باللعب ، وفيه في اللعبة جزئية خاصة بأولياء الامور عن كيفية الاستفادة القصوى من التطبيق بشرح للألعاب الموجودة ..



الوعود هي ..



  للطِفل   :

• تعريفك لأماكن جديدة و اصدقاء جُدد وفنون من مختلف انحاء العالم


• تشجيعك على استخدام مفردات بلغة غير لغتك و جعلها مُتعة


• تزويدك بمعلومات جديدة و شيقة لِتتحدث عنها و تشاركها افراد عائلتك (صارو بناتي عندهم سالفة يحكونه وين راحوا و اسم المكان ولما يشوفون مَعلم او علم لدولة في التلفزيون يحاولون يحزرون الاسم)


• الاستخدام السهل المُبسط اثناء اللعب


• نضمن مرحك و مفاجآتك

  لِـ الأم / الأب   :

• تمكين الطفل على تعلم مفردات في لغة جديدة


• تشجيع طفلك على الخوض في مغامرات ممتعة لأماكن جديدة حيث يمكنهم لعب مباريات واستكشاف مختلف الثقافات


• توفير البيئة المناسبة لتحفيز المحادثات و الخبرات بين الزملاء في اللعب


• توفير المواد والصلات لإثراء عملية التعلم والتجربة الثقافية في العالم الحقيقي


• جديرة بالثقة و آمنة و سهلة الاستخدام لك ولِطفلك


• تقديم قيمة جيدة من خلال مجموعة من الألعاب بمختلف المستويات تقودها شخصيات آمنة و جذابة

* * *



التطبيق متوفر في عدة أنظمة للتطبيقات :-

 ابل ستور - قوقل بلاي 



ولتحميل النسخة الاولى من باكا ألباكا 

ابل ستور - قوقل بلاي



* * *



الاطفال في هذا العمر الصغير اكثر تقبل لتعلم لغات اخرى غير لغته و هذا مُثبت علمياً في توسيع مداركهم وتطويرها فانصح اي أم مُهتمة بهذا الجانب تجرب هالتطبيق بنُسختيه ، فعلاً يستحق .. 



* * *



ألقاكم في مواضيع قادمة ..

مع السلامة :*

اشترك معنــا ليصلك كل جديد
Subscribe to our mailing list

الكونتور باليت والارواج السائلة من كات ڤون دي Kat Von D

بسم الله الرحمن الرحيم

موضوع اليوم عن منتج متحمسة عليه من قبل حتى لا اشتريه ..

الكونتور باليت والهايلايت من ماركة كات ڤون دي Kat Von D

وبعد الارواج السائلة المطفية حقتهم



نبدا على طول في الريڤيو :)

Kat Von Do Shade & Light Contour Palette 



في البداية بقولكم ليش اخترت هالباليت بالذات ،، قبلها كنت ابي اشتري الكونتور باليت من انستازيا ، المتوفر منه ٣ درجات ،ولان اختي عندها منه ، كنت حاطه في بالي اخذ الدرجة الميديوم .. 

مع الوقت بدت محلات التجميل توفره عندها ، دخلت مرة محل تجميل موجود في الطائف وشفته هناك..

واحترت اخذ النسخة البودرة و الكريمي ولا انتظر اخذه ارخص لا رحت دبي ، هههه ، كنت ناسية السعر ومابي ادفع زيادة وانا رايحة دبي رايحة ، لانه متوفر هناك ، فقلت خنـ اصبر .. وزين ماسويت :))

في ذاك الوقت نزلت ولاء موضوع كمقارنة بين باليت الكونتور من انستازيا و كات ڤون دي

قررت بعدها قلت كتغيير وشي جديد اخذ كات ڤون دي ، وابشوف سيفورا دبي يمكن القاه و لقيته :)

الكونتور باليت من كات ڤون دي متوفر بدرجة واحدة بس لكن الدرجات اللي فيه من اضاءة وكونتور تناسب جميع البشرات الباردة و الدافئة و العادية



__وصف المنتج__



التعليب والتغليف  : 

علبة من ورق مقوى و في الداخل مراية كبيرة بحجم العلبة ، ومن برا زخارف باسم الباليت ، شي كذا فني حبيته واتوقع من سر نجاح كات ڤون دي ومنتجاتها اهتمامها بالتفاصيل الفنية واللي سمعت انها هي تقوم فيها بنفسها!

بس مع الوقت لاحظت ان اللون الفضي فيه وخاصة ان اسماء الدرجات بهاللون ، يروح ، لاني كنت حاطته في شنطة مكياج ومع التنقل وكذا ، مِنه يمكن ..

لما شريته كان في كرتون خارجي ، ومعه مثل الخطوات التوضيحية لاِستخدام الباليت مِثل الصورة السابقة فوق ..



 كمية المنتج  :

للهايلايت ٣* (٢.٣ غرام = ٠.٠٨ أونصه) اصغر من الكونتور ٣* (٤.٥ غرام = ٠.١٦ أونصه)



المنتج يحتوي على ٣ درجات من الإضاءة و ٣ الوان للكونتور (ظل)

في العمود الاول من اليسار ، الاضاءة والكونتور تناسب البشرات الباردة Cool Toned

الأوسط تناسب البشرات ذات الدرجة الطبيعيه  Netural Toned 

واليمين تناسب البشرات الدافئة Warm Toned

اسماء الدرجات :

لاحظت ان تسمية الدرجات مرتبطة بإسم الباليت ، الإضاءة  كلها تبدا بحرف L من اسم الباليت Light

والكونتور Shade , تبدا بحرف S .. تفاصيل :)))



الإضاءة Light

Lucid : لون وردي فاتح

Lyric : لون اصفر فاتح

Levitation : لون مشمشي فاتح وناعم



الظل Shade

Sombre : رمادي بني 

Shadowplay : بني متوسط

Subconscious : بني غامق



القوام :

بودرة ناعمه حريرية كنها كريمية من نعومتها و اللون (Pigmented) فيها عالي جداً و سهل التوزيع و الدمج ،، فلو حبيتي تستخدمين الكونتور لازم تبدين بكمية بسيطة جداً وبعدها تزيدين ، وحتى الإضاءة والالوان الفاتحة تبان عالبشرة ، جربت حق اختي من باليت انستازيا ، الالوان الفاتحة فيها ماتبين وكم وكم الفرشة تروح وتجي عشان يبان اللون ولا يبين ،، في كات ڤون دي ، الاوان الفاتحة ما احتجت الا لتمرير الفرشة مرة وحدة ..



  استخدامي   :

بالنسبة لدرجة بشرتي فهي (طبيعية) مو دافئة ولا باردة .. 

ماحترت كثير في البداية عشان اعرف اللي يناسبني ، من اول تجربة لكم درجة عرفت المناسب ،،

واعتبر نفسي محظوظة لان اصحاب الدرجات الطبيعية من تجربتي يناسبهم استخدام الدرجات المتوفرة في الباليت سواء الباردة او الدافئة من الكونتور والهايلايت ، لو بغت حدة للون المونتور وشي درامي وواضح اكثر ..



ألوان الكونتور في هالباليت لاحظت ان مافيه درجة البرتقالي المزعج ، بالعكس ، فيها الكونتور صح المايل على رمادي

وايضاً بالنسبة للهايلايت ، استخدم اللون الوسطي الاصفر لماتحت العيون بعد الكونسيلر وتمااام ، يثبت الكونسيلر وينور ماتحت العين ..



استخدم في التوزيع فرشة خاصة لكل من الكونتور والهايلايت ، وفيه فرشة برأسين للكونتور و الهايلايت تنباع منفصلة ، بس لان عندي فمسكت نفسي و ماشريتها ..



ثباته عالي ويدوم لفترة طويلة ، الى اخر المناسبة وهذا شي اعجبني فيه كثر ..



عيبه الوحيد اللي اشوفه انه مافيه تعبئة ، يعني لو انتي مناسبِتك درجة واحده من الكونتور و الهايلايت وخلصت لازم تشترين جديدة ، بس ممكن استخدام الباليت مع اختك او الماما لو كانت درجاتكم تختلف عن بعض :)))



يستاهل ولا لأ : يستاهل كل ريال ! احبه مرة ..



أماكن البيع : سيفورا 

السعر : ٢٣٠ درهم

Kat Von Di Liquid Lipstick



مثل ماذكرت في موضوعي اللي فات عن حبي للآرواج السائلة ذات النهاية المطفية ، ما ترددت ابداً في تجربة ارواج كات ڤون دي من نفس الفكرة ..



اخترت درجتين من الالوان الطبيعية المناسبة لكل وقت ، و درجة قوية غامقة دامنا مقبلين على فصل الشتاء :)

حبيت كل الاوان ، اللونين الوردي والمايل للمشمشي لما حطيته صار أغمق من لونه في العلبة

اللون الغامق الدموي شي صرعة مو طبيعي ههههه ،، انا توي هـ هـ قصتي في الحب مع الالوان الغامقة وهذا يجنن ،، حطيت منه في زواج اخوي ، عجب عُجاب، ومو كل شوي اعيد عليه بس كم مرة لما بغيت استرخي ههههه ..



الدرجات :

Lolita : لون وردي غامق مائل للبنفسجي

Double Dare : لون وري غالب عليه المشمشي

Vampira : عنابي غامق



المواصفات :

الحجم : ٦.٦ مل واعتبر كميته ممتازة بالنسبة لجودته و سعره مقارنة في موضوعي السابق لسيفورا و لايم كرايم

التعليب : علبة بلاستيكية

اللون : واضح و كمية اللون كبيره وتركيزه عالي

القوام : سائل كريمي

النهاية : نهاية مطفية تماماً

الرائحة : رائحة مكياج عادي

التوزيع : سهل وبأقل كمية

الفرشة : حجمها مناسب ويساعد في التوزيع 

يدبق او لأ : لا أبداً ، بعد التوزيع ماياخذ وقت ويجف 

الثبات : عالي ويستمر لفترة طويلة تقريباً ٤ ساعات من غير مايتغير ، واخر اليوم اضطريت اشيله مع المكياج بمزيل الميك اب ، بس لازم يكون يحوي زيت ماينفع مزيل مكياج مائي

السعر : ١٠٠ درهم

الشراء : سيفورا

   السواتشات    

شرايكم ،، في منتجات كات ڤون دي ؟

اذا جربتوا شي منها شاركوني تجاربكم :)



و

ألقاكم في مواضيع جديدة

مع السلامة :* 

اشترك معنــا ليصلك كل جديد
Subscribe to our mailing list

الارواج السائلة المطفية من Lime Crime و Sephora

بسم الله الرحمن الرحيم

موضوع اليوم الوان في الوان

عن ارواج او بمعنى ادق ، روج سايل كريمي بنهاية مطفية

احب الارواج خاصة الكريمية والمطفية

اللميعة لساا ماوصلت لمرحلة حبها ماعرف ليه !

احب منظر الشفايف بلون واضح و ومظهر مرتب ..

راح اتكلم عن اللي جربتهم من سيفورا و لايم كرايم

بذكر ميزات كلٍ منهم و خصائصه و مقارنة لكم لون يتشابهون

وفي النهاية كل جزء سواتشات لها..

قبل ما ابدا ، بوضح الفرق بين هذي الارواج السائلة المطفية و بين الارواج العادية المطفية ..

الروج المطفي العادي الجامد :

يكون اساسه شمعي ، ومعاه لون 

الروج المطفي السائل :

يكون اساسه جل او ماء ، ومعاه لون 

طريقتي في الاستخدام للارواج السائلة المطفية لأفضل النتائج :

عمل تقشير للشفايف و ترطيبها زين ما زين.

تحديد الشفايف بقلم التحديد ، لون مناسب او لون مقارب لنتيجة مختلفة في كل مرة.

وقت توزيع الروج السايل احاول ما اقرب منه الين يجف لانه ممكن يحوس المكياج.

اخلي الروج معاي لما اطلع عشان الرتوش لانه خلال اليوم مع الاكل والشرب مايخف والمنظر يصير مش ولابد.

لازالته استخدم مزيلات المكياج اللي ضد الماء او اللي فيها زيت ، مزيلات المكياج اللي مافيه زيت وبس ماء ماتنفع.

بعد التنظيف ترطيب الشفايف مهم لو برجع احط من هذي الارواج لوقت ثاني ..

 Sephora Cream Lip Satin 

الارواج السائلة الكريمية من سيفورا ، مجموعة متوفرة من هالماركة بألوان متنوعة و بنهايات مختلفة

منها المطفي والكريمي واللامع

كان هالروجين من ضمن مشترياتي في اسبانيا ، كل فروع سيفورا عندنا مخلصة اكثر الالوان

ولما رحت فرع سيفورا في مدريد ، لقيت اغلب الالوان متوفرة ، واخترت اول شي اللون اللي احبه بالدرجة الوردية المائلة على البنفسجي ، والثاني كتغيير اخترت اللون الاحمر ..

وصف المنتج :

احمر شفاه سائل يعطي لون طويل الامد للشفاه يحتوي على زيت الافوكادو، يجي بنهايات مختلفة منها المطفية و المخملي بألوان متعددة

عند توزيعه ، يكون قوامه كريمي حريري خفيف ولون غني للشفايف.

الاستخدام :

 يوزع مباشرة على الشفايف بداية من الوسط باتجاه الاطراف

الألوان :

اللون عاليمين رقمه 01 Always Red ، لون احمر اساسه اصفر موفاقع ابد ، جميل ، اللون فيه كميته عاليه وقوامه كريمي سائل عند التوزيع ولما ينشف على الشفايف يعطي نهاية مطفية

اللون على اليسار رقمه 13 Marvelous Mauve ، لون وردي مايل للبنفسجي ، احب هذه الالوان ، تليق على بشرتي 

ونهايته مطفية

مواصفات :

الحجم : ٥ مل 

التعليب : علبة بلاستيكية

اللون : واضح خلال التوزيع و كمية اللون وتركيزه عالي

القوام : سائل كريمي

النهاية : نهاية مطفية تماماً

الرائحة : رائحة مكياج عادي

التوزيع : سهل لكن كمية المنتج ممكن تكون كبيرة من غير انتباه

الفرشة : حجمها كبير مقارنة لكمية اللون ، الغلط سهل

يدبق او لأ : في البداية ولما ينشف ويجف ياخذ وقت واحساس التدبيق موجود

الثبات : جيد جداً من غير اكل و شرب ، لكن مع السوالف والاكل اللون من داخل اللشفايف حيروح ويخف ويبان كنه محدد

مناسب لـ : البشرات الفاتحة الباردة والطبيعية للون الوردي، اما الاحمر مناسب للكل

السعر : اتوقع عندنا اقل من ١٠٠ ريال

الشراء : محلات سيفورا

ما أعجبني :

شكل الفرشة للمنتج المخصصة للتوزيع اطول من اللازم ، فممكن مايكون دقيق في التوزيع ، لو شفايفك عادية مو شرط نحيفة الا ما يحوس معك ولازم تاخذين وقتك تمسحين ، او ممكن مع الاستخدام يدك تتعود :)

سواتشات :

 Lime Crime Velvetines 

الارواج السائلة من لايم كرايم (ڤلڤيتينز) سوت ضجة كبيرة بالرغم انها شركة توها بادية نشاطها

اكثر الالوان اللي لفتت الانتباه لها هو لون كشمير Cashmere

اتوقع غرابة اللون هو السبب ، بس اتوقع بعد لو خلطتي كم لون ختوصلي لنفس الدرجة ، يعني له بدائل 

وبعد هاللون ماحسه يليق على كل البشرات لانه ممكن يزيد شحوب الوجه فيحتاج مكياج كامل عشان يطلع بشكل حلو..

مع السواتشات اللي كنت اشوفها لمنتجات الڤلڤتنز تشجعت اطلب كم لون منهم ، 

تصفحت موقعهم ومن حظي لقيت الالوان اللي ابيها متوفرة ..

طلبت اللون كاشمير Cashmere  واللون ريوت Riot  واللون الرد ڤلڤت الاحمر Red Velvet

اختياري لها كألوان آمنة بالنسبة لي ولدرجة بشرتي وفرصة للتجربة ،،

بس فيه الوان ثانية عجبتني مخليتها لمرة جاية .. 

وصف منتجات Velevetines من Lime Crime :

الڤلڤتنز هي عبارة عن احمر شفاه سائلة طويلة الأمد ، تعطي نهاية مطفية بلون غني للشفايف.

الاستخدام :

يُرج جيداً قبل التوزيع

يوزع بداية من الوسط للأطراف

الانتظار  لـ٣٠ ثانية ليجف

ممكن اضافة طبقة ثانية للون اعمق

الألوان :

(من اليمين)

كاشمير Cashmere : لون بيج مايل للرمادي وفيه بنفسجي

رد ڤلڤت Red Velvet : لون احمر كلاسيكي

ريوت Riot : لون طبيعي مناسب لكل وقت ، وردي مايل للمشمشي

التغليف :

وصلتني الارواج وكل كل روج في كرتون منفصل خاص ، ومجموعين في كرتونة وحده ملونة من الداخل جميلة مرة ،، فكان فيه طريقة اني اقلب الكرتون و اعيد استخدامه ، وهذا اللي صار :))

احب في المنتجات التفاصيل اللي فيها والوانها ، مرة يجذبني هذا الشي للمنتج قبل الشراء ..

الكروتن اللي كانت فيها الارواج اتوقع انها بسبب طلبي من الموقع نفسه ، فيمكن ماتكون متوفرة في طلباتكم من مواقع ثانية.

تجربة الشراء : بصرحة التجربة ماكانت ناجحة ككل ، في البداية طلبت الارواج اللي ابيها و رحت للدفع و دفعت وعندهم كان الشحن الدولي تابع لشركة واحدة محلية عندهم ، والخطا خطاي لاني ماركزت و بحثت اكثر ، كنت مستعجلة ابيهم على امل يوصلوني قبل مناسبة معينة بس ماصار ..

كان المتوقع للطلب يوصل خلال 4 اسابيع ،، ماعرف كيف قبلت بالهشي واحنا الحين بهالوقت كل شي سرع سرعة والخدمات تطورت مو زي اول ، بس برضو ارجع للاستعجال والحماس الغير مبرر لي هههه

مرت اول ٤ اسابيع للطلب وكلمت مكتب البريد السعودي عندينا ، لانه هو المفروض يسلمونه لهم لكونه البريد الحكومي ، وماكان في اي اثر للشحنة ..

و راسلت المسؤلين عن العملاء في لايم كرايم ، جاني الرد انه الشحنة ممكن تاخذ الى ٦ اسابيع !!

اعطيتهم اسبوع ،، و بعدها سويت لي حساب في الشوب اند شيب (البريد الامريكي) ورجعت راسلتهم بشكوى اني ماستلمت شي  وان اغراضي ضاعت لاني رحت للبريد اكثر من مرة و مافيه شي ..

وحده منهم ردت على وقالت خلاص حنرسلك شحنتك مرة ثانيه

وقلتلها اني ابيها تنرسل على بريدي في الشوب اند شيب وبالاخير وصلتني الارواج خلال اسبوعين!!

والله فرق .. اشتري وقت ..

فيه بنات ، لما ذكرت هالتجربة في السناب قالولي انه واجهتمهم نفس المشكلة ، 

وبعضهم وصلت شحنتهم عادي وطبيعي بالبريد العادي و البعض الثاني ماسمعت منهم للحين !!

فالزبدة ، لو بتطلبين منهم ، وعندك بريد امريكي او اي طريقة ثانية استخدميها يوفر عليك وقت ..

مواصفات :

الحجم : ٢.٦ مل 

التعليب : علبة زجاجية مثلجة

اللون : كمية اللون وتركيزه عالي

القوام : سائل كريمي

النهاية : نهاية مطفية تماماً

الرائحة : غالب عليها رائحة الڤانيلا ، لذيذة

التوزيع : سهل واللون متجانس

يدبق او لأ : اول توزيعه بس لما ينشف خلاص يروح 

الفرشة : حجمها مناسب

يدبق او لأ : في البداية ولما يجف يروح التدبيق

الثبات : جيد جداً من غير اكل و شرب ، لكن مع السوالف والاكل اللون من داخل اللشفايف حيروح ويخف ويبان كنه محدد

التغليف : كرتون لكل منتج بآلوان مفرحة ، تفاصيل جميلة ، وكلها وصلت في كرتونة اكبر جميلة بعد

السعر للواحد : 20 دولار - ٧٨ ريال من غير الشحن

الشراء : موقع لايم كرايم | Lime Crime

ما آعجبني :

العلبة الزجاجية ابداً ما عجبتني ، مو عملية ، لانه ممكن تطيح و تنكسر او تطق في الشنطة و تحوس الدنيا ، فكنت اتوتر لما احط الروج و انتبه بزيادة عليه بدل ما احذفه في علبة المكياج و بس  مع ان الزجاج كثيف بس الفكرة ظلت ترررن ههه ، وغير كذا كمية المنتج بالنسبة لسعره مبالغ فيها !!

ولو نجي نقارن بينه و بين نفس النوعية من سيفورا ، ، اشوف ان سيفورا الكمية اكثر وبسعر مناسب ..

سواتشات :

لو بسوي مقارنة للون الاحمر من سيفورا و لايم كرايم ،، ابد مافيه فرق في الدرجة الا نتفة غير ملحوظة بعد التوزيع

جربت المنتجين مع بعض لكل نص من الشفايف و ابداً ماشفت فرق ،، فاعتبر حق سيفورا 01 Always Red بديل جيد وأرخص لـ لايم كرايم Red Velevt 

المقارنة هالمرة بين ريوت Riot و 13 Marvelous Mauve ، درجة اللونين تختلف عالطبيعة 

اللي من سيفورا مايل للبنفسجي و لكن ريوت مايل للمشمشي ..

بالنسبة لي جربته مع بعض مابان الفرق ابداً ،، انا استغربت بس اتوقع انه يختلف على البشرات ..

في النهاية اشوف ان هالارواج موضة حلوة وتستحق التجربة :)

ايش الارواج السائلة المطفية المُفضلة عندكم هالفترة ،، وو لايم كرايم ولا سيفورا :)) ؟؟

ألقاكم في موضوع جديد 

مع السلامة :*

ليصلكِ الجديد ؛ اشتركِ معنـا
Subscribe to our mailing list