مراجعة : غسول من كلارينس ببذور القطن

بسم الله الرحمن الرحيم

مرحبا جميلاتي

موضوع اليوم ريڤيو عن منتج صار لي استخدمه فترة وحبيت اعرّفكم اكثر بمعلومات عنه :)



Clarins Gentle Foaming Cleanser

with Cottonseed



غسول من كلارينس ، رغوي ، ببذور القطن للبشرات العادية و المختلطة ، وفيه نوع اخر من نفس الخط للبشرات الجافة بالشيا.

سبب شرائي للغسول اني احب اغير المنتجات لبشرتي في روتين العناية ، لان بشرتي من النوع اللي يتعود على منتج و يبطل يعطي نتايج حلوة ، وهذا الغسول اخترته بالذات عشان استخدمه مع الكلاريسونيك في تنظيف الوجه.

موضوع سابق عن الكلاريسونيك ميا تو

الغسول نفسه حليبي بدون حبيبات ، ورائحته نظافة ، مو قوية ابداً ..

بشرتي ، مختلطة ، التي زون (الجبهة و الأنف و الذقن) دهني ، الحبوب غالباً تجي على فترات متباعدة من هرمونات او لو اهملت تنظيف بشرتي بشكل جيد ..

الغسول يجي في علبة بكمية ١٢٥ مل ، تحتاجين كمية صغيرة على فرشة الكلاريسونيك لوجهك كامل ونفس الشي لو تستخدمينه من غيرها ، يعطي رغوة جيدة جداً ، واحساس نظافة  من غير مايشد مررة البشرة.

في روتين عنايتي، استخدم الغسول هذا و الكلاريسونيك قبل النوم ، لو حاطة مكياج ، اشيل المكياج اول بالمزيل المناسب وبعدها اغسله بالغسول ..

بعد الغسول اكمل في روتيني قبل النوم ، من سيروم و كريمات ،، يعني في الايام اللي تكون فيها بشرتي مايلة للجفاف في الجو البارد ، الترطيب يكفي ..



غسول كلارنيس هذا من افضل الغسولات اللي جربتها في الفترة الاخيرة ، معتدل ، مايسبب جفاف او حبوب لبشرتي 

وناعم عالبشرة بحيث لو بغيت اغسل وجهي اكثر من مرة في اليوم اروح اغسلها من غير ما اخاف انه يجففها ..

المنتج صارلي ٤ شهور استخدمه ولسا ماخلص .. 

اتوقع قريب يخلص بس عشان العلبة بيضاء فمايبين لازم اقص طرفه هههه ..

سعره ١٣٠ ريال في ستاندات كلارينس ..

من الغسولات اللي انصح انك تجربينها لو حبيتي شي مناسب لبشرتك المختلطة او العادية.



 المنتج في سطور  :

• حجمه ١٢٥ مل


• رائحته لطيفة ومنعشة


• مناسب للبشرات المختلطة والعادية و حتى الدهنية


• ما استخدمه في ازالة المكياج


• كمية بسيطة تكفيك


• ناعم على البشرة ولا يسبب جفافها


• لا يسبب تهييج للبشرة او تكون حبوب


• سعره مناسب للكمية ولفترة استخدامك للمنتج


• عيبه مثل اي غسول ، علبته اللي مايبين فيها المتبقي من المنتج بس على اي حال مايأثر في اني راح اشتريه مرة ثانية ..

جربتي هذا الغسول ؟ وايش النوع المُفضل عندك هالفترة ؟ شاركوني :)





ألقاكم في مواضيع قادمة ..

مع السلامة :*

اشترك معنــا ليصلك كل جديد
Subscribe to our mailing list