بسم الله الرحمن الرحيم
Maybeline Instant Anti-Age Rewind Eraser Dark Circle
كونسيلر ميبلين هذا موضوعي لليوم ..
جربته لفترة كافية وبقولكم عنه ..
هذا الكونسيلر اشتهر كثير وكان هذا الشي من الأسباب اللي خلتني اشتريه ..
اشتريته من - مدريد - ، فكانت الدرجات هناك مو كثير ، درجتين بس ..
درجة فاتحة مرة و درجة طبيعيه (نود Nude) وهي اللي اخترتها ، وناسبتني ..
○ وصف المنتج ○
عبارة عن خافي عيوب سائل بتركيبة مُركزة ولون واضح ..
يحتوي على مواد اخرى تساعد ف علاج انتفاخات ماحول العين (غير متأكدة من فعاليتها لأني ماعندي هذي المشكلة)
العلبة بلاستيكية بحجم صغير مُصممة بحيث تقدرين تحركين الرأس بشكل دائري (لف) لاستخراج المنتج وتوزيعه من خلال الكُرة الإسفنجية على البشرة ..
متوفر ٦ درجات وتقدرون تطلبونه من النت او متاجر خاصة ..
احب استخدم هالكونسيلر كمنتج يومي ، يعني ما استخدمه للمناسبات ،،
في الآيام اللي تكون فيها هالاتي خفيفة يعطيني تغطية و تنوير لمنطقة ماتحت العين ،
لكن في الاوقات اللي هالاتي تكون اكثر من متوسطة الى غامقة ، استخدم قبله كوركتر(مُصحح) برتقالي بشكل خفيف
لان الكونسيلر لحاله مايغطيها بالشكل المطلوب و تتحول لرمادي بشكل مزعج ..
هذا شكل الاسفنجة وهي جديدة قبل اول تطبيق ..
استخدم الكرة الأسفنجية في توزيعه تحت العين ،، وأيضاً لماحول الأنف والفم ..
وللدمج استخدم اكثر من أداة ،، فرش و اسفنجة البيوتي بلندر حسب الوقت ..
لاحظت انه لازم بعد توزيع الكونسيلر ماخليه وقت طويل عالبشرة ..
لازم ادمجه بسرعه لانه ينشف ويصير صعب في التوزيع ..
○ الأدوات اللي استخدمها للدمج ○
البيوتي بلندر (الاسفنجة الوردية) : وهي رطبة ، اوزع المنتج لتحت العين و للمناطق اللي وزعت عليها الكونسيلر ، استخدم الجهة المُستدِقة للآماكن الصغيرة ، النتيجة اللي تعطيني اياه جميله وطبيعية ، احبها ..
فرشة ماك ١٣٠ : اعترف اني اول ماشريت المنتج ماحبيته لاني استخدمت في توزيعه هذي الفرشة بس لان المنتج يحتاج سرعة بعد التوزيع للدمج عشان ماينشف و يبقع ،، مع الوقت ،، حبيته اكثر ،، واستخدم هذي الفرشة لما مايكون عندي وقت للاسفنجة وابللها ..
فرشة الكابوكي الصغيرة المائلة من سنسي : هذي اخر فرشة شريتها ، واستخدمتها اكثر من مرة ،، حلاتها انها تعطي تحديد للاماكن الصغيرة كتنظيف تحت الايلاينر في نهاية العين ..
في مناسبات خفيفة استخدم لتثبيته بودرة سائبة ،، تزيد من ثباته مع انه باستخدامه بدون البودرة مالاحظت عليه اي تخطيط ..
بعد دمج الكونسيلر ، اوقات لو احتجت لتثبيت و تنوير اكثر لما تحت العين او اي مكان وزعت عليه الكونسيلر ، اوزع بإستخدام بيوتي بلندر جافة ، من الجهة المُستدقة ، من اللوس باودر (البودرة السائبة) من لورا مارسييه او اي بودرة عندك ، واخليها وقت اخلص فيه بقية مكياجي ، وقبل انتهي ازيل الزايد من البودرة بفرشة شعراتها كبيرة و كثيفة ..
والنهاية جميلة وطبيعيه ولا أحلى ..
تتوقعون لو خلص راح أرجع اشتريه ؟؟ نعم :)
الخلاصة ..
● إيجابيات ●
○ سعر مناسب
○ قوامه خفيف
○ تغطيته متوسطة
○ ينور ماتحت العين وممكن استخدامه للتنوير (هايلايتر)
○ ماسبب لي حبوب
● سلبيات ●
○ الكرة الأسفنجية غير مناسبة للي تهتم بالتعقيم والنظافة ، عني انا ماعندي مشكله :)
○ الدرجات غير متنوعة كثير
○ غير مناسب للهالات الغامقة والغامقة جداً
○ غير مناسب للبشرات الجافة والجافة جداً (خاصةً تحت العين)
○ غير اقتصادي ، ممكن يخلص بسرعة لو استخدمتيه بصورة يوميه
وانتهى الريڤيو ..
جربتوا الكونسيلر ! شرايكم فيه، شاركوني ؟؟
ألقاكم في مواضيع قادمة ..
مع السلامة :*
ليصلكِ الجديد ؛ اشتركِ معنـا
Subscribe to our mailing list
مواضيع ذات صلة
ليست هناك تعليقات:
إرسال تعليق