بسم الله الرحمن الرحيم
كثير كنت اسمع عن مثبتات المكياج و اللي تخليه يدوم لفترة اطول
ومنها اول واحد شريته لهذا الغرض وهو بخاخ ماك فكس بلس .. ولكن !!
مع الوقت عرفت ان الغرض منه مو نفس السبب اللي شريته عشانه ..
في هالموضوع معلومات عنه و استخداماته ومقارنته مع منتج ثاني حبيته لتثبيت المكياج ..
ماك فكس بلس | MAC Fix plus
اعتقد هذا اشهر منتج بين محبي الميك اب ،، واكثر الناس يمكن شرته لغرض معين و استغربوا من هالضجة وحب الناس له..
الاعتقاد الاكثر شيوعاً لهذا البخاخ انه لتثبيت المكياج في مكانه ويستمر لساعات من غير مايتحرك ولا يتغير ، بس لما الناس تشتريه عشان هالغرض تستغرب انه ما ثبت شي وان الناس تحبه مجامله وهبَّه !!
ماك فيكس بلس هو عبارة عن رذاذ يدمج مع البشرة اي منتجات بودرية استخدمتيها في مكياجك ، من بودرة تثبيت الاساس او الكونتور ، برونزر ، حمرة خدود او هايلايتر (اضاءة) وهكذا ، والنتيجة اللي تحسيها احياناً بعد هذي المنتجات البودرية من شكل مطفي تماماً لمكياجك او مثل الطباشير او طبقات يمكن ، واللي بالعادة تاخذ ساعات عشان تفرز البشرة
دهونها الطبيعة و تندمج بشكل طبيعي ، لكن مع ماك فكس بلس ، بعد استخدامك للمنتجات البودرية راح يعطيك النتيجة المخملية للميك اب على طول ويزيل اثر الطبقات للبودرة ويدمجها بشكل سلس على بشرتك ..
مع رشات من الماك فكس بلس على كامل الوجه ، بالاضافة للنتيجة المخملية لمكياجك بعد استخدامك للمنتجات البودرية ، راح يعطيك الديوي والمنظر الندي لبشرتك .. استخدمه انا بعد قبل الميك اب ، يعطي نضاره للوجه وترطيب لطيف خاصة لو نسيت احط المرطب او بالاحرى تعيجزت ..
من الاستخدامات الثانية للفكس بلس ، ممكن ترشين منه على فرشة توزيع الايشدو (ظلال العيون) قبل ما تاخذين من علبة الشدو وتوزعين ،، راح يعطي لون اقوى للشدو وبعد يخلي قوامه مايل للكريمي ..
مثبت المكياج البخاخ من سكندنفيا
Skindinavia Makeup Finishing Spray
فيه منتجات معروفه باسمها انها لتثبيت المكياج ، وعملها بالاضافة لتثبيته وانه يدوم لاطول فترة ، تقووم بنفس عمل الفكس بلس وو دمج المنتجات البودرية على البشرة بشكل سلس و مخملي ..
مثبتات المكياج لها اثر جميل و فعاله جداً في المناسبات و اوقات الصيف لما تزيد الحرارة والرطوبة و ممكن بعد بعضها يكون فيه مميزات عن غيره بانه يتحكم بالدهون او يعطي ترطيب وهكذا ..
من هذه المنتجات هو مثبت المكياج البخاخ من سكندينيفيا ، هذا المنتج كان قبل يُستخدم في الافلام والستوديوهات لتثبيت المكياج تحت حرارة الاضاءة لاطول فترة ممكنة من دون الحاجه لعمل الرتوش كل فترة .. شركة سكيندينيفيا متخصصة فقط في مثبتات المكياج ، يعني كل اللي عندهم انواع من المثبتات من المثبتات الخاصة بالعروس او للمكياج او للتحكم بالدهون وكذا. قريت مرة ان مثبت المكياج السبراي من اربن ديكاي هو من هالشركة وفيه نفس الخصائص بس زين اني ماشريته لان عندي الاصل :)) بس اتوقع راح يكون هو خياري الثاني لان مثبت سكندينيفيا غير متوفر في السوق ولازم طلب عكس اربن ديكاي.
حقائق من مُصنعي سكندينيفيا لتثبيت المكياج :
٩٠ بالمية من المستخدمين يتفقون ان المكياج اخر اليوم نفسه اول ماحطوه
٩٤ بالمية من المستخدمين يتفقون ان البخاخ يعطي بشرتهم مظهر ديوي وصحي متألق
مُثبت انه يساعد في ابقاء المكياج بعيد عن التجمع في اماكن خطوط التجاعيد او المسام (يعني ما يخطط ويتكتل)
يحوي البخاخ تقنية تخلي سطح البشرة بارد وهالشي يمنع من ان المكياج يذوب او يختفي
جميع بخاخات سكندينيفيا خالية من البارابين و لا تسبب حساسية
طبعاً هذي الحقائق موجودة في موقعهم ولو دخلتوه بتلقونهم مغيرين شكل العلبة الحين ،، البخاخ اللي عندي للبشرة العادية ، لاني ذيك الفترة يوم اخذته كانت بشرتي مختلطة بس مايلة للجفاف (كان شتااااء).
استخدامي للماك فكس بلس و بخاخ سكندينيفيا :
قبل وضع المكياج ابخ رشة خفيفة على كامل الوجه من فكس بلس و بعدها بثواني لما يجف ابدا بالروتين ،، لما انتهي يجي دور مثبت المكياج من سكندينيفيا ، اخض العلبة أول وامسكه على امتداد يدي و ابخ قد المسافة على كامل الوجه (قبل المسكارا)، منها يروح اثر المنتجات البودرية و يعطيني النتيجة المخملية اللي ابيها ويثبت ساعات ساعات ،، من جد ماكنت اصدق ان المنتجات هذي لها اثر و بس لما جربت صدقت .. بالعادة احط مكياجي الصباح/الظهر واطلع لعزيمتي و للناس اللي بشوفهم ، وارجع البيت انسى انا كنت حاطه شي او لا ، حتى ماتعب نفسي خلال اليوم ، دايم كنت اطالع المراية وبببح كل شي مختفي خاصة من الجو الحار و الغطا وكذا .. بعد سكندينيفيا من جد المكياج ثبت ، يعني وانا قاعدة بوسط الناس واطلع مرايتي عالاقل يسواا اشيك واسوي رتوش على بودرة و كحلة ،، ولا رجعت اروح امسح مكياجي من قلب :))
هذا ريڤيو كذا، سعيد ، للمنتجين ، احبهم اثنينهم ،، ومستحيل يخلى مكياجي من غيرهم ..
Evian Facial Spray
بخاخ الوجه من ايڤيان ، ذكرته لان له نفس فكرة المنتجين ، وفوق هذا ذاكرين على العلبة انه يستخدم لتثبيت المكياج ، انا بالنسبه لهالشي ماجربته ، يمكن ينفع لدمج البودرة عالوجه بس للتثبيت ممممم....
من وصف المنتج على العلبة : رذاذ لطيف لترطيب البشرة و انعاش المكياج .. يستخدم للازالة العرق والكلور و تهدئة البشرة من حروق الشمس و للبشرة المتهيجة ..
استخدامي :
المنتج حلو ماعليه يعني ،، انا اللي اشوفه انه ماء في علبة مضغوطة ، منعش للبشرة ، يرطبها ترطيب خفيف لطيف ، وحلو للاستخدام خلال اليوم للانتعاش ،، وانا استخدمه بعد التشقير ، الحف وكذا .. ممكن استخدمه خلال اليوم لانعاش المكياج لو الرتوش كانت ببودرة مثلاً ، بس لازم اتاكد ان المسافة للبخاخ عند الرش تكون بعيد عشان ماينقط :)
القاكم في مواضيع جديدة
مع السلامة :*
ليصلكِ الجديد ؛ اشتركِ معنـا
Subscribe to our mailing list
مواضيع ذات صلة
ليست هناك تعليقات:
إرسال تعليق