الارواج السائلة المطفية من Lime Crime و Sephora

بسم الله الرحمن الرحيم

موضوع اليوم الوان في الوان

عن ارواج او بمعنى ادق ، روج سايل كريمي بنهاية مطفية

احب الارواج خاصة الكريمية والمطفية

اللميعة لساا ماوصلت لمرحلة حبها ماعرف ليه !

احب منظر الشفايف بلون واضح و ومظهر مرتب ..

راح اتكلم عن اللي جربتهم من سيفورا و لايم كرايم

بذكر ميزات كلٍ منهم و خصائصه و مقارنة لكم لون يتشابهون

وفي النهاية كل جزء سواتشات لها..

قبل ما ابدا ، بوضح الفرق بين هذي الارواج السائلة المطفية و بين الارواج العادية المطفية ..

الروج المطفي العادي الجامد :

يكون اساسه شمعي ، ومعاه لون 

الروج المطفي السائل :

يكون اساسه جل او ماء ، ومعاه لون 

طريقتي في الاستخدام للارواج السائلة المطفية لأفضل النتائج :

عمل تقشير للشفايف و ترطيبها زين ما زين.

تحديد الشفايف بقلم التحديد ، لون مناسب او لون مقارب لنتيجة مختلفة في كل مرة.

وقت توزيع الروج السايل احاول ما اقرب منه الين يجف لانه ممكن يحوس المكياج.

اخلي الروج معاي لما اطلع عشان الرتوش لانه خلال اليوم مع الاكل والشرب مايخف والمنظر يصير مش ولابد.

لازالته استخدم مزيلات المكياج اللي ضد الماء او اللي فيها زيت ، مزيلات المكياج اللي مافيه زيت وبس ماء ماتنفع.

بعد التنظيف ترطيب الشفايف مهم لو برجع احط من هذي الارواج لوقت ثاني ..

 Sephora Cream Lip Satin 

الارواج السائلة الكريمية من سيفورا ، مجموعة متوفرة من هالماركة بألوان متنوعة و بنهايات مختلفة

منها المطفي والكريمي واللامع

كان هالروجين من ضمن مشترياتي في اسبانيا ، كل فروع سيفورا عندنا مخلصة اكثر الالوان

ولما رحت فرع سيفورا في مدريد ، لقيت اغلب الالوان متوفرة ، واخترت اول شي اللون اللي احبه بالدرجة الوردية المائلة على البنفسجي ، والثاني كتغيير اخترت اللون الاحمر ..

وصف المنتج :

احمر شفاه سائل يعطي لون طويل الامد للشفاه يحتوي على زيت الافوكادو، يجي بنهايات مختلفة منها المطفية و المخملي بألوان متعددة

عند توزيعه ، يكون قوامه كريمي حريري خفيف ولون غني للشفايف.

الاستخدام :

 يوزع مباشرة على الشفايف بداية من الوسط باتجاه الاطراف

الألوان :

اللون عاليمين رقمه 01 Always Red ، لون احمر اساسه اصفر موفاقع ابد ، جميل ، اللون فيه كميته عاليه وقوامه كريمي سائل عند التوزيع ولما ينشف على الشفايف يعطي نهاية مطفية

اللون على اليسار رقمه 13 Marvelous Mauve ، لون وردي مايل للبنفسجي ، احب هذه الالوان ، تليق على بشرتي 

ونهايته مطفية

مواصفات :

الحجم : ٥ مل 

التعليب : علبة بلاستيكية

اللون : واضح خلال التوزيع و كمية اللون وتركيزه عالي

القوام : سائل كريمي

النهاية : نهاية مطفية تماماً

الرائحة : رائحة مكياج عادي

التوزيع : سهل لكن كمية المنتج ممكن تكون كبيرة من غير انتباه

الفرشة : حجمها كبير مقارنة لكمية اللون ، الغلط سهل

يدبق او لأ : في البداية ولما ينشف ويجف ياخذ وقت واحساس التدبيق موجود

الثبات : جيد جداً من غير اكل و شرب ، لكن مع السوالف والاكل اللون من داخل اللشفايف حيروح ويخف ويبان كنه محدد

مناسب لـ : البشرات الفاتحة الباردة والطبيعية للون الوردي، اما الاحمر مناسب للكل

السعر : اتوقع عندنا اقل من ١٠٠ ريال

الشراء : محلات سيفورا

ما أعجبني :

شكل الفرشة للمنتج المخصصة للتوزيع اطول من اللازم ، فممكن مايكون دقيق في التوزيع ، لو شفايفك عادية مو شرط نحيفة الا ما يحوس معك ولازم تاخذين وقتك تمسحين ، او ممكن مع الاستخدام يدك تتعود :)

سواتشات :

 Lime Crime Velvetines 

الارواج السائلة من لايم كرايم (ڤلڤيتينز) سوت ضجة كبيرة بالرغم انها شركة توها بادية نشاطها

اكثر الالوان اللي لفتت الانتباه لها هو لون كشمير Cashmere

اتوقع غرابة اللون هو السبب ، بس اتوقع بعد لو خلطتي كم لون ختوصلي لنفس الدرجة ، يعني له بدائل 

وبعد هاللون ماحسه يليق على كل البشرات لانه ممكن يزيد شحوب الوجه فيحتاج مكياج كامل عشان يطلع بشكل حلو..

مع السواتشات اللي كنت اشوفها لمنتجات الڤلڤتنز تشجعت اطلب كم لون منهم ، 

تصفحت موقعهم ومن حظي لقيت الالوان اللي ابيها متوفرة ..

طلبت اللون كاشمير Cashmere  واللون ريوت Riot  واللون الرد ڤلڤت الاحمر Red Velvet

اختياري لها كألوان آمنة بالنسبة لي ولدرجة بشرتي وفرصة للتجربة ،،

بس فيه الوان ثانية عجبتني مخليتها لمرة جاية .. 

وصف منتجات Velevetines من Lime Crime :

الڤلڤتنز هي عبارة عن احمر شفاه سائلة طويلة الأمد ، تعطي نهاية مطفية بلون غني للشفايف.

الاستخدام :

يُرج جيداً قبل التوزيع

يوزع بداية من الوسط للأطراف

الانتظار  لـ٣٠ ثانية ليجف

ممكن اضافة طبقة ثانية للون اعمق

الألوان :

(من اليمين)

كاشمير Cashmere : لون بيج مايل للرمادي وفيه بنفسجي

رد ڤلڤت Red Velvet : لون احمر كلاسيكي

ريوت Riot : لون طبيعي مناسب لكل وقت ، وردي مايل للمشمشي

التغليف :

وصلتني الارواج وكل كل روج في كرتون منفصل خاص ، ومجموعين في كرتونة وحده ملونة من الداخل جميلة مرة ،، فكان فيه طريقة اني اقلب الكرتون و اعيد استخدامه ، وهذا اللي صار :))

احب في المنتجات التفاصيل اللي فيها والوانها ، مرة يجذبني هذا الشي للمنتج قبل الشراء ..

الكروتن اللي كانت فيها الارواج اتوقع انها بسبب طلبي من الموقع نفسه ، فيمكن ماتكون متوفرة في طلباتكم من مواقع ثانية.

تجربة الشراء : بصرحة التجربة ماكانت ناجحة ككل ، في البداية طلبت الارواج اللي ابيها و رحت للدفع و دفعت وعندهم كان الشحن الدولي تابع لشركة واحدة محلية عندهم ، والخطا خطاي لاني ماركزت و بحثت اكثر ، كنت مستعجلة ابيهم على امل يوصلوني قبل مناسبة معينة بس ماصار ..

كان المتوقع للطلب يوصل خلال 4 اسابيع ،، ماعرف كيف قبلت بالهشي واحنا الحين بهالوقت كل شي سرع سرعة والخدمات تطورت مو زي اول ، بس برضو ارجع للاستعجال والحماس الغير مبرر لي هههه

مرت اول ٤ اسابيع للطلب وكلمت مكتب البريد السعودي عندينا ، لانه هو المفروض يسلمونه لهم لكونه البريد الحكومي ، وماكان في اي اثر للشحنة ..

و راسلت المسؤلين عن العملاء في لايم كرايم ، جاني الرد انه الشحنة ممكن تاخذ الى ٦ اسابيع !!

اعطيتهم اسبوع ،، و بعدها سويت لي حساب في الشوب اند شيب (البريد الامريكي) ورجعت راسلتهم بشكوى اني ماستلمت شي  وان اغراضي ضاعت لاني رحت للبريد اكثر من مرة و مافيه شي ..

وحده منهم ردت على وقالت خلاص حنرسلك شحنتك مرة ثانيه

وقلتلها اني ابيها تنرسل على بريدي في الشوب اند شيب وبالاخير وصلتني الارواج خلال اسبوعين!!

والله فرق .. اشتري وقت ..

فيه بنات ، لما ذكرت هالتجربة في السناب قالولي انه واجهتمهم نفس المشكلة ، 

وبعضهم وصلت شحنتهم عادي وطبيعي بالبريد العادي و البعض الثاني ماسمعت منهم للحين !!

فالزبدة ، لو بتطلبين منهم ، وعندك بريد امريكي او اي طريقة ثانية استخدميها يوفر عليك وقت ..

مواصفات :

الحجم : ٢.٦ مل 

التعليب : علبة زجاجية مثلجة

اللون : كمية اللون وتركيزه عالي

القوام : سائل كريمي

النهاية : نهاية مطفية تماماً

الرائحة : غالب عليها رائحة الڤانيلا ، لذيذة

التوزيع : سهل واللون متجانس

يدبق او لأ : اول توزيعه بس لما ينشف خلاص يروح 

الفرشة : حجمها مناسب

يدبق او لأ : في البداية ولما يجف يروح التدبيق

الثبات : جيد جداً من غير اكل و شرب ، لكن مع السوالف والاكل اللون من داخل اللشفايف حيروح ويخف ويبان كنه محدد

التغليف : كرتون لكل منتج بآلوان مفرحة ، تفاصيل جميلة ، وكلها وصلت في كرتونة اكبر جميلة بعد

السعر للواحد : 20 دولار - ٧٨ ريال من غير الشحن

الشراء : موقع لايم كرايم | Lime Crime

ما آعجبني :

العلبة الزجاجية ابداً ما عجبتني ، مو عملية ، لانه ممكن تطيح و تنكسر او تطق في الشنطة و تحوس الدنيا ، فكنت اتوتر لما احط الروج و انتبه بزيادة عليه بدل ما احذفه في علبة المكياج و بس  مع ان الزجاج كثيف بس الفكرة ظلت ترررن ههه ، وغير كذا كمية المنتج بالنسبة لسعره مبالغ فيها !!

ولو نجي نقارن بينه و بين نفس النوعية من سيفورا ، ، اشوف ان سيفورا الكمية اكثر وبسعر مناسب ..

سواتشات :

لو بسوي مقارنة للون الاحمر من سيفورا و لايم كرايم ،، ابد مافيه فرق في الدرجة الا نتفة غير ملحوظة بعد التوزيع

جربت المنتجين مع بعض لكل نص من الشفايف و ابداً ماشفت فرق ،، فاعتبر حق سيفورا 01 Always Red بديل جيد وأرخص لـ لايم كرايم Red Velevt 

المقارنة هالمرة بين ريوت Riot و 13 Marvelous Mauve ، درجة اللونين تختلف عالطبيعة 

اللي من سيفورا مايل للبنفسجي و لكن ريوت مايل للمشمشي ..

بالنسبة لي جربته مع بعض مابان الفرق ابداً ،، انا استغربت بس اتوقع انه يختلف على البشرات ..

في النهاية اشوف ان هالارواج موضة حلوة وتستحق التجربة :)

ايش الارواج السائلة المطفية المُفضلة عندكم هالفترة ،، وو لايم كرايم ولا سيفورا :)) ؟؟

ألقاكم في موضوع جديد 

مع السلامة :*

ليصلكِ الجديد ؛ اشتركِ معنـا
Subscribe to our mailing list

تطبيق فيدلي Feedly

بسم الله الرحمن الرحيم

الموضوع اليوم بداية لسلسة حبيتها تكون في مدونتي

عن تطبيقات احبها واستخدمها دايماً ..



شرح عن كل تطبيق و فائدته ..

التطبيقات متوفرة في الآب ستور للآجهزة اللي تعمل بنظام iOS

ومتوفرة غالباً لآنظمة الأندرويد ..

نبدا ..

تطبيق فيدلي Feedly

تم اطلاق هذا التطبيق في عام ٢٠٠٨ ، وهو عبارة عن منصة تعرض لك مجموعة من الاخبار من مصادر متنوعة على الانترنت

مع اتاحة مشاركتها مع الاخرين ، ويعمل على مختلف متصفحات الانترنت و انظمة الجوال والاجهزة المتنقلة ..

تطبيق فيدلي feedly يستخدم التوصيف الخاص لكل موقع او مدونة وهو الـ RSS  .. 

"خدمة RSS هي عبارة عن وسيلة سهلة تمكنك من الحصول على آخر الأخبار فور ورودها على مواقعك المفضلة على شبكة الإنترنت. فبدلاً من فتح صفحات المواقع والبحث عن المواضيع الجديدة ، فإن خدمة RSS تخبرك بالجديد من أخبار ومواضيع على تلك المواقع فور نشرها. ولقد عني بالمصطلح RSS عبارة Rich Site Summary وهو مصطلح قديم ، وهناك مسميات أخرى له ، أما حالياً فالعبارة الأشهر استخداماً هي Really Simple Syndication. وأغلب موفري خدمة الـ RSS هم أصحاب المواقع الإخبارية والمدونات العربية والأجنبية ، لأنها تتيح لهم إيصال أخبارهم “الأحدث” مباشرة إلى المتلقي بدون الحاجة إلى زيارة مواقعهم."

من فترة حول اكثر من السنة ، قررت قوقل إحالة خدمة Google Reader للتقاعد وإغلاقه

انا كنت مشتركة بإيميلي واضفت روابط مواقع من مدونات و غيرها في القوقل ريدر ، ولما تم اغلاقه ، ضعت!!

جربت اكثر من برنامج وتطبيق ، مجاني و بفلوس بس ما اشبع رغبتي في اني ارجع اقرا في كل مره ..

تطبيق فيدلي feedly ، كان هو اختياري ، جربته بالصدفة ، يتم فيه تسجيل دخول للتطبيق او التسجيل و من الخيارات تسجيل الدخول بحسابك في قوقل ، و راح يسحب كل الروابط و المدونات المشتركة فيها في قوقل ريدر (لو كان عندك) من اول ويضيفها في هذا التطبيق ..

احلى شي ،، كل الروابط في مكان واحد ..

بالنسبة لي فيدلي feedly مُفضل عندي جداً عن البلوق لوڤين Blogloving للمدونات لعدة اسباب :

- البلوقلوفين ممكن ابحث عن رابط لمدونة و القاها بأكثر من نسخة

- البلوقلوفين بالنسبة لي تصفحه مو مريح

- مافيه خيارات متعددة للمشاركة في اي تطبيق ثاني

من الاشياء اللي احبها بعد في فيدلي feedly ، الخلفية للتطبيق لو بغيتها للقراءة الليلية تصير اسود والاعتيادي ابيض

فعشان كذا راح تلاقون الخلفية سوداء ، احبها كذا :)))

شرح التطبيق ..

بعد تسجيل الدخول حتكون هذي القائمة من عاليسار..

اول جزئية (اول ٣ سطور) حيبين لك الصفحة الرئيسية Home و اللي حتظهر لك اخر الاخبار للمواقع المشتركة فيها.

Save For Later للمواضيع اللي عملتيلها حفظ للقراءة في وقت لاحق.

Explore لاكتشاف روابط ومدونات ومواقع جديدة وراح يفرزها لك حسب الاهتمام كالتالي ..

 بالصور : صفحة الهوم Home في فيدلي feedly حتكون كاستعراض لاخر الاخبار و المواضيع الجديدة

بالضغط على زر الاكسبلور في فيدلي feedly ، حتظهر لك مجموعة من التصنيفات

وتحت هذه التصنيفات مدونات و مواقع تابعة لهذا التصنيف وتختارين اللي تبين و تضغطين علامة الزائد ليتم الاشتراك و يوصلك جديد هذه المواقع على الوقت

اثناء قراءة اي موضوع في التطبيق ، توجد ايقونة بثلاث نقاط في الاعلى ، بجانب ايقونة المشاركة في التويتر

و بوكت Pocket (بوكت هو تطبيق متخصص في حفظ الروابط للقراءة لاحقاً)

راح تظهر نافذة ، يوجد فيها عدد من الايقونات للمشاركة و القراءة والارسال لتطبيقات اخرى ..

الايقونة باللون الاخضر صارت خضراء بسبب اني ضغطت عليها عشان رغبتي في حفظ هذا الموضوع للقراءة في وقت لاحق في التطبيق .. او مجرد حفظ للرجوع له مستقبلاً ، وراح القاه في القائمة الاساسية للتطبيق مثل ما ذكرت قبل شوي ..

التطبيق ممكن بعد تتصفحين اخر الاخبار عن طريق الكمبيوتر في موقعهم

تدخلين على الموقع وتسجيل دخول بحسابك ، وراح تظهر لك اخر الاخبار المشتركة فيهم ..

* * *

لإضافة رابط والاشتراك في خدمة RSS لأي موقع او مدونة :

في القائمة الجانبية لـ تطبيق فيدلي feedly او حتى لو تتصفحين من خلال موقعهم ، راح تلقين Add Content

كالتالي :

بعد الضغط عليه راح تفتح لك صفحة يوجد فيها مربع البحث

واللي راح تتيح لك كتابة الرابط او لصقه 

او لو كان عندك رابط الـ RSS للموقع اضيفيه لدقة اكثر ..

والتطبيق راح يقترح عليك روابط للموقع سواء كان الرابط الاساسي او رابط الـ RSS للموقع اللي تبين

اكتبي او الصقي الرابط للموقع او المدونة ، وبعدها انتر

ولما تظهر لك المدونة او الموقع ، في الاعلى اضيفها لخلاصتك بالضغط على علامة الزائد 

* * *

لتغيير الخلفية من السوداء للبيضاء والعكس

في اسفل القائمة الجانبية ، تلقون Switch Theme

بمعنى تبديل القالب 

وبالضغط عليه راح يتغير للقالب الاساسي وهو اللي بالابيض

* * *

وايضاً في القائمة الجانبية راح تلقون Sittings

وراح تظهر لكم نافذة تقدرون منها تغيرون و تعدلون خياراتكم في الاستخدام

* * *

تطبيق فيدلي feedly تطبيق جيد و انصح بتجربته

متوفر في الاب ستور و القوقل بلاي

سعره : مجاني

فيدلي feedly في الاب ستور : هُـنا

فيدلي feedly في قوقل بلاي : هُنــا

او بالبحث في المتجر المُستخدم باسم Feedly

* * * *

ألقاكم في مواضيع قادمة

مع السلامة :*

ليصلكِ الجديد ؛ اشتركِ معنـا
Subscribe to our mailing list

مقارنة | ماك Fix+ ومثب المكياج من سكندنفيا Skindinavia

بسم الله الرحمن الرحيم

كثير كنت اسمع عن مثبتات المكياج و اللي تخليه يدوم لفترة اطول

ومنها اول واحد شريته لهذا الغرض وهو بخاخ ماك فكس بلس .. ولكن !!

مع الوقت عرفت ان الغرض منه مو نفس السبب اللي شريته عشانه ..

في هالموضوع معلومات عنه و استخداماته ومقارنته مع منتج ثاني حبيته لتثبيت المكياج ..

ماك فكس بلس | MAC Fix plus

اعتقد هذا اشهر منتج بين محبي الميك اب ،، واكثر الناس يمكن شرته لغرض معين و استغربوا من هالضجة وحب الناس له..

الاعتقاد الاكثر شيوعاً لهذا البخاخ انه لتثبيت المكياج في مكانه ويستمر لساعات من غير مايتحرك ولا يتغير ، بس لما الناس تشتريه عشان هالغرض تستغرب انه ما ثبت شي وان الناس تحبه مجامله وهبَّه !!



ماك فيكس بلس هو عبارة عن رذاذ يدمج مع البشرة اي منتجات بودرية استخدمتيها في مكياجك ، من بودرة تثبيت الاساس او الكونتور ، برونزر ، حمرة خدود او هايلايتر (اضاءة) وهكذا ، والنتيجة اللي تحسيها احياناً بعد هذي المنتجات البودرية من شكل مطفي تماماً لمكياجك او مثل الطباشير او طبقات يمكن ، واللي بالعادة تاخذ ساعات عشان تفرز البشرة

 دهونها الطبيعة و تندمج بشكل طبيعي ، لكن مع ماك فكس بلس ، بعد استخدامك للمنتجات البودرية راح يعطيك النتيجة المخملية للميك اب على طول ويزيل اثر الطبقات للبودرة ويدمجها بشكل سلس على بشرتك  ..



مع رشات من الماك فكس بلس على كامل الوجه ، بالاضافة للنتيجة المخملية لمكياجك بعد استخدامك للمنتجات البودرية ، راح يعطيك الديوي والمنظر الندي لبشرتك .. استخدمه انا بعد قبل الميك اب ، يعطي نضاره للوجه وترطيب لطيف خاصة لو نسيت احط المرطب او بالاحرى تعيجزت ..



من الاستخدامات الثانية للفكس بلس ، ممكن ترشين منه على فرشة توزيع الايشدو (ظلال العيون) قبل ما تاخذين من علبة الشدو وتوزعين ،، راح يعطي لون اقوى للشدو وبعد يخلي قوامه مايل للكريمي ..

مثبت المكياج البخاخ من سكندنفيا

Skindinavia Makeup Finishing Spray

فيه منتجات معروفه باسمها انها لتثبيت المكياج ، وعملها بالاضافة لتثبيته وانه يدوم لاطول فترة ، تقووم بنفس عمل الفكس بلس وو دمج المنتجات البودرية على البشرة بشكل سلس و مخملي ..

مثبتات المكياج لها اثر جميل و فعاله جداً في المناسبات و اوقات الصيف لما تزيد الحرارة والرطوبة و ممكن بعد بعضها يكون فيه مميزات عن غيره بانه يتحكم بالدهون او يعطي ترطيب وهكذا ..

من هذه المنتجات هو مثبت المكياج البخاخ من سكندينيفيا ، هذا المنتج كان قبل يُستخدم في الافلام والستوديوهات لتثبيت المكياج تحت حرارة الاضاءة لاطول فترة ممكنة من دون الحاجه لعمل الرتوش كل فترة .. شركة سكيندينيفيا متخصصة فقط في مثبتات المكياج ، يعني كل اللي عندهم انواع من المثبتات من المثبتات الخاصة بالعروس او للمكياج او للتحكم بالدهون وكذا. قريت مرة ان مثبت المكياج السبراي من اربن ديكاي هو من هالشركة وفيه نفس الخصائص بس زين اني ماشريته لان عندي الاصل :)) بس اتوقع راح يكون هو خياري الثاني لان مثبت سكندينيفيا غير متوفر في السوق ولازم طلب عكس اربن ديكاي.

حقائق من مُصنعي سكندينيفيا لتثبيت المكياج :

٩٠ بالمية من المستخدمين يتفقون ان المكياج اخر اليوم نفسه اول ماحطوه

٩٤ بالمية من المستخدمين يتفقون ان البخاخ يعطي بشرتهم مظهر ديوي  وصحي متألق

مُثبت انه يساعد في ابقاء المكياج بعيد عن التجمع في اماكن خطوط التجاعيد او المسام (يعني ما يخطط ويتكتل)

يحوي البخاخ تقنية تخلي سطح البشرة بارد وهالشي يمنع من ان المكياج يذوب او يختفي 

جميع بخاخات سكندينيفيا خالية من البارابين و لا تسبب حساسية

طبعاً هذي الحقائق موجودة في موقعهم ولو دخلتوه بتلقونهم مغيرين شكل العلبة الحين ،، البخاخ اللي عندي للبشرة العادية ، لاني ذيك الفترة يوم اخذته كانت بشرتي مختلطة بس مايلة للجفاف (كان شتااااء).

استخدامي للماك فكس بلس و بخاخ سكندينيفيا :

قبل وضع المكياج ابخ رشة خفيفة على كامل الوجه من فكس بلس و بعدها بثواني لما يجف ابدا بالروتين ،، لما انتهي يجي دور مثبت المكياج من سكندينيفيا ، اخض العلبة أول وامسكه على امتداد يدي و ابخ قد المسافة على كامل الوجه (قبل المسكارا)، منها يروح اثر المنتجات البودرية و يعطيني النتيجة المخملية اللي ابيها ويثبت ساعات ساعات ،، من جد ماكنت اصدق ان المنتجات هذي لها اثر و بس لما جربت صدقت .. بالعادة احط مكياجي الصباح/الظهر واطلع لعزيمتي و للناس اللي بشوفهم ، وارجع البيت انسى انا كنت حاطه شي او لا ، حتى ماتعب نفسي خلال اليوم ، دايم كنت اطالع المراية وبببح كل شي مختفي خاصة من الجو الحار و الغطا وكذا .. بعد سكندينيفيا من جد المكياج ثبت ، يعني وانا قاعدة بوسط الناس واطلع مرايتي عالاقل يسواا اشيك واسوي رتوش  على بودرة و كحلة ،، ولا رجعت اروح امسح مكياجي من قلب :))

هذا ريڤيو كذا، سعيد ، للمنتجين ، احبهم اثنينهم ،، ومستحيل يخلى مكياجي من غيرهم ..

Evian Facial Spray

بخاخ الوجه من ايڤيان ، ذكرته لان له نفس فكرة المنتجين ، وفوق هذا ذاكرين على العلبة انه يستخدم لتثبيت المكياج ، انا بالنسبه لهالشي ماجربته ، يمكن ينفع لدمج البودرة عالوجه بس للتثبيت ممممم....

من وصف المنتج على العلبة : رذاذ لطيف لترطيب البشرة و انعاش المكياج .. يستخدم للازالة العرق والكلور و تهدئة البشرة من حروق الشمس و للبشرة المتهيجة ..

استخدامي :

المنتج حلو ماعليه يعني ،، انا اللي اشوفه انه ماء في علبة مضغوطة ، منعش للبشرة ، يرطبها ترطيب خفيف لطيف ، وحلو للاستخدام خلال اليوم للانتعاش ،، وانا استخدمه بعد التشقير ، الحف وكذا .. ممكن استخدمه خلال اليوم لانعاش المكياج لو الرتوش كانت ببودرة مثلاً ، بس لازم اتاكد ان المسافة للبخاخ عند الرش تكون بعيد عشان ماينقط :) 

القاكم في مواضيع جديدة

مع السلامة :*

ليصلكِ الجديد ؛ اشتركِ معنـا
Subscribe to our mailing list

التونتورينق بالسلف تان من لانكستر | Tontouring with Lancaster

بسم الله الرحمن الرحيم

موضوع اليوم عن تجربتي لواحده من طرق الميك اب الجديدة ، اللي صارت كنها مسابقة هههه ومنها تستفيد الشركات التجميلية بالمنافسة من يطلع منتج للطريقة هذي و يمشي في السوق ، بس قبل ما ابدا لازم امر على باقي التكنيكات و تعريف بسيط لكل منها ..

على فترات متقاربة في الآونة الاخيرة صارت تطلع تكنيكات في الميك اب و تطبيقه و توزيعه ، مو لازم كل طريقة تناسبك او تعجبك بس حلو الاطلاع عليها وتتعرفين عالجديد وتقررين تجربينها او لا :)

من الاشياء اللي طلعت زمان كان الكونتورينق Contouring والهايلايت Highlight واللي ظل متربع على ساحة المكياج وعمل ضجة مرة لمدة طويلة .. والحين من التكنيكات الجديدة:  البيكينق Baking - الستروبينق Strobing - التونتورينق Tontouring ..

جميع هالتكنيكات في الميك اب بدأت في مجال التصوير للعارضات و ابراز الملامح والتركيز على شي دون الاخر ومنها راح يستخدمها حسب المناسب له كل محبي المكياج في تطبيقها في حياتهم العادية ..

الكونتور والهايلايت | Contour & Highlight :

النحت والإضاءة ، النحت لتصغير وابراز ملامح الوجه (مع ان الجسم بعد ينفعله هالطريقة) باستخدام بودرة اغمق من درجتك بثنتين او ثلاث بالكثير ويكون لونها مايل للبني مو البرتقالي ، او استخدام نوعين من الاساس ، واحد افتح من درجتك لاماكن الاضاءة والثاني اغمق بدرجتين تقريباً حسب رغبتك على اماكن الكونتور اللي تبين والدمج فيما بينهم بفرشة خفيفة او بالبوتي بلندر ،، وبعد من الطرق استخدام منتجات الكونتور الكريمية مثل الكونسيلر ..

النتيجة اللي حتعطيك اياه وتحدي استخدامك للمنتجات حسب طبيعة بشرتك و نوعها ، مثلاً الدهنية تستخدم المنتجات البودرة والجافة الكريمية ، وجميع البشرات الفاونديشن المناسب لك و كذا .. واما عن النتيجة وشكلها ، ممكن الكونتور يساعد في ابراز وجنتيك باعطاء ظل تحت عظمة الخد من بداية نهاية الاذن لنصف الخد ،ممكن على منابت الشعر في الجبهة لتصغيرها .. الهايلايت و الإضاءة ممكن يكون بنفس لون الفاونديشن اللي تستخدمينه ،، انا عني ماحب الهايلايت يبان كثير ، ويكون اعلى الخدين وعلى استقامة الانف و وسط الجبهة و كله بكميات بسيطة .. والمنتجات حسب تفضيلك ، بودرة او كريمية ..

فيديوهات من اليويتوب توضحها اكثر هنا

كونتور المهرج | Clown Contour :

والمحترفين ما خلوا الكونتور والهايلايت كذا بهالبساطة ، زودوا عليها احترافية اكثر للناس المتقدمة في الميك اب ، الكلاون كونتور يختلف عن الكونتور العادي بكمية الالوان والدرجات ، يعني مو بس هايلايت و كونتور ، راح يضاف له لون البلشر ،، وكونسيلر مناسب مشمشي مثلاً ، وغالباً يكون الاستخدام بالمنتجات الكريمية ،، ويبدا بتوزيع كل شي على الوجه بالتقسيم بداية بالهايلايت وهكذا و ينتهي بدمجه باستخدام البيوتي بلندر (اسفنجة) يعني كله يعتمد على شطارتك بالدمج ..

فيديوهات من اليويتوب توضحها اكثر هنا

البيكينق | Baking :

عبارة عن خبز/طبخ (مالقيت غير هالتعبير ههه) بوضع طبقة كثيفة من البودرة السائبة على مناطق الاضاءة ، مثل وسط الجبهة و امتداد عظمة الانف و المنطقة مابين اسفل نصف الخد واعلى الفك ، وترك هذي الطبقة على البشرة لين تمتصه ، وبعدها بمدة تاخذين فرشة كثيفة الشعر وتشيلين بخفة الزائد منها و راح يبقى اثر الاضاءة بشكل لطيف..

طريقة البيكينق ، تستخدم في المكياج الثقيل ، لانها تتوزع وتتطبق كآخر خطوة ، وبما انها طبقة كثيفة من البودرة فحيكون المكياج ثقيل ولايمكن استخدام هالطريقة في الايام العادية.. وايضاً لانها منتجات بودرية ، ممكن يعطي شكل الطبقات للمكياج و البشرات الجافة ممكن يسبب جفافها اكثر ..

فيديوهات من اليويتوب توضحها اكثر هنا

الستروبينق | Strobing :

مايختلف كثير عن الهايلايت العادي من وجهة نظري ، الا من ناحية قوة الاضاءة ،، في الستروبينق الاستخدام للمنتجات الكريمية لاعطاء نتيجة رطبة و واضاءة عاكسة بشكل حيوي تبان فيه اللبشرة ..

فيديوهات من اليويتوب توضحها اكثر هنا

وبطل اليوم هو .. التونتورينق Tontouring ..

معنى التونتور، شبيه للكونتور اللي هو نحت و توضيح معالم الوجه وابراز عظام الخدين و تصغير الجبهة مثلاً والتحديد الفك السفلي .. لكن يختلف عنه ، في الكونتور نسنخدم منتجات البودرة ، مثل البرونزر او بلشر مطفي اغمق من درجتنا مايل للبيج الغامق شوي او البني ، في الطريقة الجديدة للتوتنور هو نفسه الكونتور لكن باستخدام منتجات التان للتسمير الذاتي (Self Tanner) ووتوزيعها في نفس اماكن الكونتور والنحت اللي كنتي تحطينه من قبل وراح يظل عندك كونتور رباني طبيعي لأيام (لان التان والتسمير يستمر لمدة 5 ايام اذا مو اكثر) من غير الحاجة انك في كل مرة تحطين برونزر :)))

او ماشفته هالطريقة عند اليوتيوبر Wayne Goss وانا داخله مزاجي الفكرة ،، مرة عجبتني لاني احب الكونتور والنتيجة اللي يعطيني اياها ،، وقلت دام عندي السلف تان من لانكستر ، ليش لااا :)

الادوات :

• السلف تان من لانكستر درجة ميديم


• فرشة للتوزيع من ايلامسكا


• فرشة من سنسي للدمج


• علبة صغيرة لوضع الكريم فيها (لانه يبقع على الجسم والاصابع فانتبهي)

الطريقة :

بعد ما حطيت كمية من السلف تانر في العلبة ، اخذت فرشة الامسكا السودا ، ووزعت بداية عند منابت الشعر وبداية الخد من الاذن ، بالدمج بفرشة سنسي ، دمجته في الجبهة وانتبه عشان ماخلي حدود واضحة ، وبعد الما اوزع السلف تانر عند بداية الخد امده بالدمج على شوي شوي وانتبه بعد لا اكثر واوزعه في اماكن انا مااحتاجها ،، وبعد بالضافة لهالمنطقتين ، وزعت بالاماسكا خط الفك السفلي و دمجته بسنسي عشان اخفف من الحدود القوية ..

بعد كذا خليته لمدة 3 ساعات ، وغسلته عادي .. بصراحة فرق معاي ،، هههههه ،، يعني كثير ماعجبهم بس عطاني تحديد حلو كني حاطة ميك اب بس لي وجه اقول اني قمت من النوم خلقه كذا ههه .. 

درجة السلف تانر من لانكستر الميديوم ، كانت وسط يعني ممكن اعيد عليها بعد كم يوم ، الدرجة اللي عطاني مايلة شوي للبرتقالي واتوقع تختلف حسب درجتك ، انا اي شي يصير برتقالي ، مع ان لون الكريم مايل للعسلي و ريحته تجنن بصراحة مدري ليه اختي تقول فيه لمحة حنا ،، انا ماحسيت ابداً :| ..

ماهو كريم التسمير الذاتي Slef Tanner



كريمات التسمير الذاتي (Self Tan) هي كريمات تعطي الجسم والوجه لون السمااار من غير التعرض للشمس ، وتدوم لمدة مابين ٣-٥ أيام، اعتبرها طريقة اجمل مايكون ، ما أضطرر اتعرض للشمس وقت طويل ، والوقت للون التان يكون تحت امرك وعلى رغبتك حسب المدة اللي تبينها لو تبين اكثر من ٤ ايام ممكن تعيدين عليه ولو ماعجبك على حالك كلها يومين و يروح.

كريم التسمير الذاتي من لانكستر الدرجة ميديوم (وسط)
.

 
تختلف درجة التسمير حسب المذكور عالكريم ..

فمثلاً هذا السلف تان من لانكستر فيه ٣ درجات:


١- فاتح Light


٢- وسط Medium


٣- غامق Dark



اخترت الوسط، حسيته افضل و اقدر ازيد عليه لو حبيت درجة اغمق ونفس الشي للدرجة اللايت لكن الدارك ممكن يطلع اغمق من اللي ابيه ففضلت اتحكم بالدرجة خاصة انه اول مرة اجرب هالمنتجات ..

هذا المنتج من لانكستر بالشكل الجديد ، قبل كان لون علبته برتقالي ..

بشرتي فاتحة ، وجربته و طلع اللون حلو وماحتجت اعيد عليه ،، مافيه درجة البرتقالي الفاقع اللي كلنا نخاف منها ههه ..

وحلو وخفيف ،،

قبل الاستخدام ، لازم تسوين سنفرة للجسم او بليفة الحمام المغربي لو عندك ، وسكرب عادي للوجه عشان تشيلين الخلايا الميتة و يتساوى ملمس الجلد ، وممكن بعدها كريم مرطب خفيف ..

بعدها تلبسين قفاز نايلون قبل تووزعين كريم التان لانه حيطبع على يدك ..

فيه ريحة حنا خفيفة على قولة اختي لان جربناها سوااا بس تروح على طول ..

الحلو بعد في هالسلف تان من لانكستر انه ما اثر على بشرتي واختي اللي اعتبر بشرتها حساسة ولا سبب مشاكل او حبوب ..

شريته من باريس قاليري دبي ، وسعره حول ١٥٠-١٦٠ درهم ..

آلقاكم في مواضيع جديدة

مع السلامة :*

ليصلكِ الجديد ؛ اشتركِ معنـا
Subscribe to our mailing list