موضة ربيع ٢٠١٦ في دولابك

بسم الله الرحمن الرحيم

الشتاء عندنا بين يوم وليلة يروح ، وبعده مو متعودين عالربيع قد مايجي الصيف على طول هههه

لكن في ببعض المناطق الربيع عندهم مو بس حر ويستمتعون بالجو والدفا بعد برد الشتااا ..



لـ مُحبي الموضة ، موضوعي اليوم ..

عن كم ترند في موسم ربيع وصيف ٢٠١٦ للقطع الأساسيه واللي ممكن تكون عندك ، من ملابس أو اكسسوارات أو أحذية ،، وأيضاً الألوان الدارجة هالفترة ..

راح تلاحظون اغلب القطع متكررة في اغلب المحلات ، رحت من فترة قريبة للسوق وشفت كذا قطعه عجبتني و عالموضة ..



في الموضوع ، راح اذكر بعض الموديلات الدارجة ، والقطع اللي تناسبها (عندي من قبل) أو شريتها قريب :)



في البداية ،، هذي ألوان ربيع ٢٠١٦

ولو تشوفونها مُنعشة تناسب هالفصل ، واللون الازرق بدرجاته حاضر ومتربع :)

* * *



  موضة ربيع / صيف ٢٠١٦ الأساسية : 



● الإكسسوارات : طبقات من السلاسل ●

طبقات السلاسل الناعمة موضة هالموسم في الاكسسوارات ،، العقد هذا شريته من محل آلدو للاكسسوارات و عجبني فيه كل سلسلة وله تعليقة من حجر وغيره .. حلو على تيشرت سادة يعطيه شكل مختلف ..



● الأكتاف الظاهرة ●

في هالموسم موضة الاكتاف الظاهرة في القطع العلوية دارجة جداً ، ممكن كـ بوزة تبين جزء من الكتفين أو الاكتاف كاملة ،، القطعة في الصورة ، شريتها من بيرشكا ، عجبتني قصتها و خامتها خفيفة ، ربيعية ، وبعد لأن موضة المخطط بعد ماشية هالفترة واللون الأزرق ،، مع ان اغلب اللي شفته ، تخطيط عريض ، بس المهم موضة :))))

● بلوزة (تي شيرت) بسيط أبيض أو رمادي ●

التيشرتات البيضاء والرمادية آساسية ، مافيه دولاب يخلو منها (صح؟) هالموضة بالنسبة لي من المُسلّمات و ألبسهم طول الوقت ، لاني احب هاللونين و التيشرتات ما استغني عنها ،، احب اكثر شي اللي تجي بفتحة V أو على شكل U ..

عموماً ، الـ Tops ذات اللون الابيض سواء قمصان أو تيشرتات بعد متواجده بقوة هالفترة ..



● الطابع الڤيكتوري ●

احب هالستايل مرة ،، يعطي أناقة ورُقي ،، وبعد احب القمصان اللي تجي بكشكشة اخر الكم أو في اعلى الكولار (الياقة) في القميص .. من الدارج هالموسم بعد اللي لاحظتها القطع و الملابس المُستوحاة من قمصان النوم .. !! تتوقعون راح تمشي عندنا !! عني انا لاااا :)))



● الجينزات ●

هالسنة موضة جينزات البويفرند Boyfriend Jeans اللي تكون واسعة - والجينزات المقطعة مستمرة ..

ممكن تلبسينهم وانتي مرتاحة ههه .. وبعد دارج هالموسم السكيني جينز وطوله لحد الكعب يعني من غير حركة التسفيط اخر شي :)) ،، و بعد اللون الابيض للجينزات حضوره قوي ..





● الفستان الجينز ●

الفستان الجينز دارج مررة ،، وممكن جاكيت جينز أو سديري (ڤيست Vest) ..

شفت كثير في محلاتنا عارضين فساتين جينز بأشكال ودرجات ألوان مختلفة ..

الفستان في الصورة عندي من سنين ومن زمان مالبسته ، فقلت حلو انه رجعت موضته و اوثقه بصورة :)))





● الشبشب بـ كعب عريض ●

مالقيت كلمة لطيفة غير (الشبشب) ههههه ،، شريتها لان عجبني اللون مرة ..

 وكثير دارج الكعب العريض هالموسم ..



● الويدج صندل Wedge Sandal ●

الويدج صندل ماعرف ترجمتها بس هي الصنادل اللي يجي كعبها متصل لين المُقدمة ..

دارجة بقوة في ربيع وصيف هالسنة ..

هالصندل عجبني شريته في تخفيضات نهاية السنة من كلاركس ، احب اللون هذا مررة ، وماصدقت يخلص البرد عشان اقدر البسه :)

لاحظت في اغلب محلات الأحذية صنادل كثير اللي تجي مرتفعة لكن بنفس الارتفاع للككعب و المقدمة فهمتوا علي!

ويجي جزء منها بلون ابيض ،، ذكرتني بموضة الدباب زمااااان هههه بس هذي أهون ،،

اشهرهم اللي نزلتها ستيلا مكارتني ،، حلوة للناس الجريئة في طلااتها :)



هنا بعض القطع اخترتها وتناسب موسم الربيع

وبس هذي بعض الترندات هالفترة ،، ان شاء الله ألهمتكم في رحلتكم التسوّقية الجاية :)





ألقاكم في مواضيع قادمة :)

مع السلامة :*

ليصلكِ الجديد ؛ اشتركِ معنـا
Subscribe to our mailing list